“Aleanca e kullave”, Bardhi i përgjigjet Bashës: Ke marrë dy kate në një kullë, je vetëshpallur kryetar!

Kërkesa e kryetarit të Grupit Parlamentar të Partisë Demokratike, Gazment Bardhi, drejtuar Parlamentit për të futur në rendin e ditës projektvendimin për rishikimin e përbërjes së Komisionit të Reformës Zgjedhore, zgjoi nga gjumi deputetin Lulzim Basha, i cili ashtu i përgjumur edhe reagimin e bëri të lidhur me kulla e pallate, që është dhe detyra e tij funksionale e përcaktuar nga Kunati.

“Sot është data 5 tetor. Më 4 shtator ju keni bërë një njoftim të ardhur nga PDSH. U bë një muaj që ky njoftim dhe vendimet e mëpasshme të PDSH injorohen dhe nëpërkëmben nga ana juaj. Përkundër zotimit që bëtë, që pas konsultimit të rregullave do bëni publik vendimin tuaj. Ju nuk keni bërë asnjë vendim publik. Po merrni zvarrë përfaqësuesit demokratik të PDSH duke vendosur sipas qejfit tuaj dhe jo sipas Kushtetutës. Fshiheni pas një akti administrativ siç është rregullorja, e cila nuk ju jep asnjë të drejtë për të penguar vendimmarrjen formale.

Sot flisni për vendime të grupit parlamentar të PD. Nuk ka vendime, janë interpretimet tuaja të njëanshme. Dihet mirë pse i bëni këto interpretime, e doni opozitën siç ju do qejfi ju, e doni siç e kishit në Kukës. Kjo nuk është në dorën tuaj, jepini fund kësaj maskarade. Është detyra juaj të shpreheni pro Kushtetutës, pro ligjit për partitë politike, pro kodit zgjedhor. Ose nëse keni vendosur kulisat tuaja të errëta të aleancave të kullave, dilni e thojuni se jeni pjesë e aleancave,” tha Lulzim Basha dhe përgjigjen nuk do ta qëndiste askush më mirë se njeriu që e kishte në krah dhe sot e akuzon me bandën e tij si “njeriu i Saliut”, dhe zyrtarisht është Kryetar i Grupit Parlamentar i PD, Gazment Bardhi:

“U emocionova shumë veçanërisht nga kjo Aleanca e Kullave. Parafolësi është i vetmi që muaj e fundit ka marrë nja dy kate në një kullë dhe kur vjen këtu për të akuzuar kolegët për aleanca të kullave, numëro katet në kullat më të shtrenjta të tuat dhe familjarëve të tu. Je i vetmi njeri në këtë sallë i vetëshpallur kryetar.

Nuk guxon të mbledhësh grupin. Je ti dhe 3 të tjerë që të shkojnë nga mbrapa. Nuk je përfaqësues i PD-së. Je i rikthyer pas një viti e gjysmë mungese gjoja për të bërë opozitën, por opozitën e ke me kolegët e tu, se me këta mbrapa nuk ta mban,” tha Gazment Bardhi duke sqaruar dhe opinionin se kush është ai që akuzon për aleanca të kullave.

Dhe, çuditërisht Lulzim Basha më shumë u acarua pse përgjigjen nuk i dha Kryetarja e Parlamentit, Lindita Nikolla, se sa për akuzat që e pagëzuan pronar të dy kateve në një kullë.

“Znj. Kryetare prisja përgjigje nga ty dhe jo nga autorët e kësaj zallamahie. Meqë keni vendosur të nxirrni dhjam nga pleshti, jep përgjigje. Për ata që kanë vendosur të bëjnë luftën e tyre të ndyrë personale, në tradhti të interesave të qytetarëve dhe demokratëve, kam një përgjigje, shumë shpejt do të përballeni me vetëdijen tuaj, me projektligjin për vettigun politik,” tha deputeti Lulzim Basha dhe si i papërgjegjshëm që është akuzon edhe veten duke e futur në të vetmin parlament “që nga viti 1991 ka një rregull, që deputeti nuk ka përgjegjësi për atë që thotë”!

Meqë për shqiptarët nuk ishte ndonjë hata që Lulzim Basha na paska marrë edhe dy kate në një kullë, ai i kërkoj Kryetares së Parlamentit të zbatoi ligjin, Kushtetutën, mori dhe përgjigjen nga Lindita Nikolla:

“Do të merrni përgjigjen e duhur. Unë kam thënë që do i drejtohem shërbimeve juridike dhe do i drejtohem dhe Komisionit të Rregullores për këtë situatë të paprecedentë.”