Fatura do i shkojë vetëm Edi Ramës, Berisha: Ne do fitojmë!

Qëllimi numër një i Partisë Demokratike, tha sot Kryetari i PD, Sali Berisha, është rikthimi i të drejtës së shqiptarëve për të votuar si qytetarë të lirë ndërsa rinia do jetë prioritet i të gjitha prioriteteve në qeverisjen e PD!

I pyetur për kandidatët e Alibashës dhe Lulzim Bravës, Kryetari i Partisë Demokratike gjatë bashkëbisedimit në rrjetin social Facebook tha se ata janë vetëm paterica të Erion Veliajt, ndërsa ftoj të gjithë emigrantët që më 14 maj të jenë në Shqipëri dhe të votojnë ndryshimin

“Çështja më themelore që duhet të zgjidhë PD nesër në pushtet është rikthimi i besimit te të rinjtë shqiptarë dhe te shqiptarët në tërësi, se e ardhmja mund të ndërtohet në Shqipëri dhe se Shqipëria është një vend i bekuar me pasuri mahnitëse.

Nuk ka diskutim se rinia do jetë prioritet i të gjitha prioriteteve.

Së pari, një mundësi reale që të shkollohen në të gjitha shkallët e arsimit.

Së dyti, një përpjekje e gjithanshme për punësimin e tyre, një sistem kreditimi për strehimin dhe bizneset e tyre, bonuse për sipërmarrësit që punësojnë të rinjtë.

Pra, një kompleks masash, të cilat jo vetëm do bëjnë që të rinjtë të mos largohen nga Shqipëria, por kam besim se qindra dhe mijëra të rinj të rikthehen në këtë vend për të ndërtuar të ardhmen e tyre,” tha Sali Berisha duke e bërë të qartë se qëllimi numër një i Partisë Demokratike është rikthimi i të drejtës së shqiptarëve për të votuar si qytetarë të lirë.

“Qeveria e Edi Ramës nuk ka legjitimitet. Ai ka humbur që në krijimin e saj.

Kjo qeveri u votua mbi sistemin e patronazhistëve dhe makinerinë e grabitjes së votës.

Qëllimi numër një është rikthimi i të drejtës së shqiptarëve për të votuar si qytetarë të lirë.
Unë ju garantoj se do bëhet gjithçka për t’i shkurtuar jetën qeverisë së Edi Ramës dhe që qytetarët të votojnë të lirë.

Edhe në këtë fushatë, Rama po shkel çdo rregull dhe parim të zgjedhjeve të lira dhe të barabarta.

Në fund, fatura do i shkojë vetëm atij. Ne do fitojmë!” tha lideri i opozitës duke paralajmëruar rikthimin e tretë të Sali Berishës në qeverisje, që sipas tij, do jetë më i suksesshmi, njësoj si Steve Jobs!

“Rikthimi i tretë i Sali Berishës në qeverisje do jetë më i suksesshmi.

Do e krahasoj edhe njëherë me Steve Jobs, i cili pasi e larguan nga ndërmarrja e tij, u rikthye dhe i bëri botës iPod, iPad dhe iPhone.

Një rikthim i tretë do ketë momente kulmore, gjithçka në interes të shqiptarëve.

Ne arritëm me ato reforma ekonomike që ju thoni, të kalojmë nga grupi i vendeve me të ardhura të ulëta, në grupin e vendeve me të ardhura të mesme të larta. Arritëm të jemi njerëzit më të paguar në Ballkan, madje më të paguar se bullgarët dhe rumunët. Objektivi ynë ishte të kapnim sllovenët se ata janë me rroga më afër me vendet e 15-shes së BE.

Ku e bazoja unë këtë objektiv?

Asnjë vend në Ballkan, as Sllovenia, as Serbia, nuk ka pasuri përrallore të Shqipërisë. Në këtë kontekst, është në detyrën e një qeverie që këto pasuri t’i kthejë një mirësi, në mirëqenie, në rroga, në pensione, begati dhe progres të qytetarëve.

Kështu që unë mbetem i sigurt në realizimin e këtyre objektivave,” tha Kryetari i Partisë Demokratike, duke ftuar të gjithë emigrantët për të qenë më 14 maj në Shqipëri dhe për të votuar për pluralizmin

“Normalisht çdo emigrant kudo që ndodhet, më 14 maj duhet të votonte aty ku gjendet.

Sot teknologjia e bën të mundur votimin në kohë reale kudo që ndodhet shqiptari.
Por pengesa e vetme për këtë është Edi Rama, i cili nuk pranon dhe nuk do të pranojë që në këto zgjedhje të votojë emigracioni.

Por, këto janë zgjedhjet e jetës sonë, në kuptimin e asaj që ne ftohemi pas 32 vitesh te kutitë e votimit për të rivendosur pluralizmin dhe përmbysur monizmin.

Në këtë kontekst, në këtë betejë, angazhimi i emigracionit, qoftë duke qartësuar rolin jetik që ka pluralizmi për shoqërinë shqiptare, qoftë duke marrë ato kursime që kanë për të ardhur për ët votuar, është i një rëndësie shumë të madhe.

Me këtë rast i ftoj të gjithë emigrantët për të qenë më 14 maj në Shqipëri dhe për të votuar për pluralizmin.

Sikundër i ftoj ata që nuk kanë mundësi, të bëjnë gjithçka me telefonata, jo vetëm me familjarët, por edhe më të afërmit e tyre, t’u kujtojnë se pse nuk ndodhen në Shqipëri. T’i ftojnë të votojnë kandidatët e primareve, të votojnë ndryshimin.”

Në fund, Kryetari i Partisë Demokratike, Sali Berisha, e bëri të qartë se të gjithë kandidatët e Alibashës dhe Bravës janë vetëm paterica të Erion Veliajt.

“Çdo kandidat përveç Belind Këlliçit, është kandidat i Edi Ramës.

Ai kandidon për të ndihmuar kandidatin e Edi Ramës, që përbën në vetvete falsititetin më të madh, një nga njerëzit më të korruptuar të këtij vendi, një nga njerëzit më mashtrues dhe më pa ndjenja për qytetarët.

Të gjithë kandidatët e Alibashës dhe Bravës janë vetëm paterica të Erion Veliajt.

Janë njerëz që kanë kaluar në krah, në sqetullat e Edi Ramës, nuk kanë asgjë të përbashkët me të djathtën.
Nuk besoj kurrë se e djathta mund të bëhet me njerëz si Alibasha dhe Lulzim Brava, të cilët janë pengje në lidhje krimi të Edi Ramës.”