Fermerëve në Divjakë, Basha: 100 mln € subvencione, 50 mln për infrastrukturë dhe naftë pa taksë
Kryetari i Partisë Demokratike, Lulzim Basha, sot ka një mesazh ndryshe për fermerët e Divjakës dhe jo vetëm, ndërsa sqaron në detaje planin e Partisë Demokratike për Bujqësinë premton 100 milionë euro subvencione, 50 milionë për infrastrukturë dhe naftë pa taksë qarkullimi
“Ne duhet të jemi krenar që jemi nga Divjaka, ky vend i begatë. Prodhohet, problem është shitja. Nuk kemi mbështetje nga shteti absolutisht! Po qe për subvencione, nuk flitet fare! Këtu është makabër, nuk të njeh fare. As karburant, sepse karburanti është baza jetike e një. Nuk ta njeh njeri, unë po të them kam 7 hektarë tokë që po i administroj, ore, absolutisht zero! Zero! Nuk të mbështet njeri fare, nuk do t’ia dijë se prodhon, se akoma je gjallë apo ke vdekur! Absolutisht! E gjen mundësinë ta blesh vetë? u rrit dapi dhe nitrati tani para zgjedhjeve. 1200 lekë kuintali. Çmenduri! Unë i marr tokat me qira, kam 7 hektarë toka, në rëra i kam 10’000 mijë lekë dynymi, dhe në dhera i kam 15’000 lekë dynymi. Toka jonë punohet tre herë, unë po të marr ekonomistë dhe ekonomisë i bie llogarisë, unë dal piramidë, i falimentuar!” tha fermeri Lulzim Noreci në kabinën e traktorit të tij ku po i rendiste Kryetarit të Partisë Demokratike shqetësimet e tij dhe fermerëve të zonës që sot janë harruar nga shteti.
Problemet e fermerëve janë të ditura tashmë dhe se qeveria nuk ka mbështetur fermerët as sa vendet e rajonit, tha lideri i opozitës duke përsërityr programin e Partisë Demokratike për bujqësinë, i cili parashikon 100 milionë euro subvencione për fermerët, 150 milionë euro për infrastrukturën bujqësore dhe uljen e çmimit të naftës me 240 lekë.
“Unë nuk mendoj se i bëhet vonë atij për produktet e Divjakës por nuk është çështje që dua të diskutoj me ty. Ajo që dua të them është që në qoftë se Kosova me gjysmën e buxhetit të Shqipërisë arrin të japë subvencione, në qoftë se Maqedonia me një buxhet afërsisht sa i Shqipërisë jep 100 milionë euro, pse mos të japim ne? Po e the ti ku shkojnë paratë? Kjo është. Pra, me 25 prill vendimi që do marrësh është ku do të shkojnë paratë. Atje ku kanë shkuar këto 8 vite apo do vijnë për subvencione, për ndihmë për ju. Do mbështetje si në çdo vend tjetër të botës do të keni mbështetje,” u zotua Basha si Kryeministër i ardhshëm
“Subvencionet një, këto rrugët që këtu që mezi i kalon edhe këto do të jenë pjesë, do të keni 150 milion Euro në vit për infrastrukturën bujqësore. Që ne do t’i bëjmë subvencionet realitet kjo është 1000% e sigurt. Do të shkojnë paratë tek bujqësia, do të shkojnë aty ku jeton gjysma e popullsisë. Pra Kosova e bën do ta bëjmë dhe ne realitet. Dhënia e subvencioneve, ndërtimi i infrastrukturës bujqësore, dhënia e aksesit tuaj në treg, ulja e çmimit të naftës me 240 lekë, drejtë për së drejti juve ju fusin në treg. Dhe çfarë do bëjë? Ngaqë futesh në borxh, se më the e shet nën kosto lakrën, ti do kesh fitim. Kur ke fitim ti dhe familja jote ka fitim dhe konsumatori në qytet. Kur ka fitim dhe konsumatori në qytet, fiton edhe shteti. Pra, ne sot jemi në një cikël dështimesh,” tha Kryetari i PD duke sqaruar se dështon Edi Rama t’ju ndihmojë ju sepse ndihmon vetëm veten e tij, dështoni ju të shisni prodhimet sepse nuk i nxirrni dot në treg, dështon familja shqiptare të sigurojë ushqim cilësor me çmim të përballueshëm.
“Me 25 prill ndryshimi do të jetë pikërisht kjo. Do fusim një cikël pozitiviteti. Do fitosh ti, subvencionet e tua, subvencionet që do marrësh nga shteti do të mundësojnë që produktet e tua të shiten dhe ti të dalësh me fitim, do fitojë konsumatori shqiptar sepse ti me ato subvencione do e nxjerrësh me çmim më të ulët dhe në momentin që fitojnë edhe fermerët edhe konsumatorët, ka fituar dhe shteti,” tha Kryetari i Partisë Demokratike, Lulzim Basha, duke përfunduar:
“Ky është ndryshimi i dashur. Prandaj, të ftoj me 25 prill, të gjithë masivisht për ndryshimin që është për ju.” –
