Kosova me masa kundër COVID-19, qytetarët dynden drejt Shqipërisë për fundjavë

Qytetarët e Kosovës kanë vendosur që këtë fundjavë ta kalojnë në Shqipëri. Mëngjesin e sotëm janë parë radhë të gjata automjetesh në pikën kufitare në Vermicë.  Pritjet për të dalë nga Kosova po zgjasin deri në 30 minuta.

Masat e vëna nga qeveria e Kosovës që drejtohet nga Albin  Kurti  kanë bërë që qytetarët sot t’ia mësyjnë me të madhe Shqipërisë.

Nga pika kufitare e Vërmicë shihen kolona të gjata automjetesh që tanimë kanë marrë rrugën për në Shqipëri për ta kaluar fundjavën.

Edhe Qendra Kombëtare për menaxhim kufitar ka njoftuar se nga mëngjesi i sotëm janë krijuar kolona deri në 100 metra për dalje nga Kosova. Derisa, sipas tyre pritjet janë duke shkuar nga 20 deri në 30 minuta.

Kjo për shkakun se Kosova aktualisht gjendet nën masa të rrepta anti-COVID19, që përfshijnë mbylljen totale të gastronomisë, përveç me “Take Away” si dhe  orën policore.

Kësisoj, qytetarët e Kosovës  kanë zgjedhur që ditët e fundjavës t’i kalojnë në Shqipëri, pasi që sot në Kosovë edhe ashtu në sektorin publik është ditë pushimi.

Qeveria e Kosovës ka miratuar të hënën masa të reja për parandalimin e përhapjes së koronavirusit.

Këto masa, për dy javët e ardhshme ndalojnë qarkullimin e qytetarëve nga ora 22:00 deri në 05:00, përveç në raste urgjente.

Shërbimet e gastronomisë obligohen të pezullojnë aktivitetin e tyre nga data 7 prill deri me datë 18 prill.

Shërbimet e gastronomisë lejohen të punojnë vetëm me shërbimet “merr me vete”, “dërgesë me porosi” apo marrjes së porosive pa u larguar nga makinat.

Sipas vendimit të Qeverisë së Kosovës, ndalohet veprimtaria e qendrave të mbyllura tregtare, përveç shërbimeve esenciale në kuadër të tyre, siç janë dyqanet ushqimore dhe farmacitë, nga data 7 prill deri më datë 18 prill.

Në qendrat e hapura tregtare lejohet aktiviteti duke i respektuar masat dhe rekomandimet për kontrollin, parandalimin dhe luftimin e pandemisë COVID – 19.

Instituti Kombëtar i Shëndetësisë Publike në Kosovë (IKSHPK) ka njoftuar të enjten se janë regjistruar edhe 12 viktima nga koronavirusi.

Prej 13 marsit të vitit të kaluar, kur janë raportuar rastet e para me koronavirus në Kosovë, autoritetet shëndetësore kanë regjistruar 96.212 të infektuar. Prej tyre 1.960 kanë vdekur ndërsa 80.132 janë shëruar./Monitor/