Festa e Abaz Aliut në Malin e Tomorit, Baba Mondi: Të jemi më reflektues dhe optimistë

Besimtarë bektashinj kremtuan sot Festën e Abaz Aliut në Malin e Tomorit në Berat.

Në ceremoninë e organizuar me këtë rast Kryegjyshi Botëror i Bektashinjve Haxhi Dede Edmond Brahimaj, tha se “ju falënderoj të gjithë ju që keni marrë rrugën për në malin  fisnik të Tomorit për t’iu bashkuar gëzimit të këtij pelegrinazhi historik”.

“Rrugët e këtij Mali të Shenjtë, sheshi i kësaj teqeje ku mblidhemi çdo vit u mbushën me hapat dhe zërat e besimtarëve. Ka një gjë të veçantë pelegrinazhi i sivjetshëm, këtu në malin e lashtë dhe mistik të Tomorit, pasi kjo periudhë përkon me 105 vjetorin e themelimit të kësaj Teqeje,” tha Baba Mondi duke shtuar:

 “Ballkani, Europa po përjetojnë vështirësi komplekse, ku në botë ka trazira deri në luftë me viktima shoqëruar me tragjedi botërore si në Afganistan duhet të na bëjë të gjithëve më të paqtë, më reflektues, më të ndërgjegjshëm e më optimistë dhe këtë ta reflektojmë tek vetja, familja e kudo që jemi”.

Mijëra pelegrinë udhëtuan sot Teqesë së Kulmakut për të kremtuar festën e Baba Tomorrit nën ritmet fetare të bektashinjve, pavarësisht besimeve fetare që i përkasin.

Të gjithë besimtarët dhe pelegrinët që i bashkohen kësaj feste të shenjtë, në shenjë mirësie bëjnë kurban një qengj për veten dhe familjen.

Sipas gojëdhënave thuhet se Abaz Aliu, nga Arabia, së bashku me vëllanë e tij të vogël, u vendosën në Berat, duke u bërë mbrojtës të nahijes. I vëllai mbronte qytetin e Beratit, ndërsa Abaz Aliu u vendos në Tomor, për të mbrojtur gjithë fiset dhe krahinat e Tomorit. Ditën e 25 gushtit shpirti i tij vjen nga Olimpi dhe kthehet përsëri për të çliruar viset e Beratit nga gjithë të këqijat. Populli ka respekt e nderim hyjnor për dy vëllezërit, sepse betohet “për Baba Tomor”, “për Abaz Ali”.

Legjendat e gojëdhënat popullore hedhin dritë mbi frikën, mbi forcën magjike të barnave që përdoreshin për shërimin e sëmundjeve, por shprehin njëkohësisht respekt dhe nderim për Baba Tomorin e për Abaz Alinë. Shenjtërimi i Tomorit nuk është rastësi, por është rrjedhojë e bukurive të rralla dhe e madhështisë së tij. Mbi këto bukuri të veçanta të tij u krijuan misteret, miti, legjenda, gojëdhëna./ATSH/