“Financimet ruse të Bashës”, Berisha: Lulzim, kudo që të shkosh, para teje shkojnë dosjet e tua!

Lulzim Basha është mbajtur peng me këtë dosje dhe duhet të japë përgjigje për origjinën e këtyre parave, tha sot Kryetari i Partisë Demokratike, Sali Berisha, duke siguruar se nga fondet që Biniatta ka dorëzuar te Nick Muzin, nuk kanë kaluar asnjë prej tyre nga arka e PD-së dhe fondet e PD-së dhe për këtë arsye, përgjegjësia nuk është e PD, por është individuale e Lulzim Bashës dhe atyre që janë përfshirë në këto transanksione.

Duke u distancuar nga kjo aferë kryekëput e ish-kryetarit të PD, ai u zotua se do të ngrejë një komision auditi për të bërë transparencën e plotë ndërs kërkojë hapjen e një hetimi të plotë për të larguar çdo dyshim që lidh PD-në me dosjen ruse, ndërsa sqaroi në konferencën e përjavshme dhe pse i kishte ngjitur nofkën “peng i Ramës”.

“Vladimir Putini dhe Rusia janë rrezik madhor për paqen dhe stabilitetin në Europë. Në kuadër të debateve të shpërthyera ditët e fundit, PD deklaron sa vijon:

PD si parti e interesit kombëtar të shqiptarëve është forca e parë që ka kërkuar anëtarësimin në NATO. E ka bërë këtë, në një kohë kur të tjerët nuk kanë arritur ta bëjnë. PD në qeveri, është ndër vendet më të para që ka firmosur partneritetin për paqen me NATO-n, në kundërshtim me interesat strategjike të Rusisë.

PD është forca që ka vendosur vendin në dispozicion për manovrat e NATO-s dhe SHBA. Në det, ajër dhe tokë. Ndërkohë që PS sillte rezoluta në parlament kundër bashkëpunimit dhe anëtarësimit në NATO.

PD në qeveri është forca që kundër interesave strategjike ruse, anëtarësoi Shqipërinë në NATO.

PD në qeveri, duke kundërshtuar interesat madhore strategjike ruse, dha një kontribut historik me rolin e saj në projektin e gazsjellësit TAP, duke mos u joshur nga asnjë presion. Ajo mbështeti, loboi për TAP, duke parandaluar kështu pushtimit të korridorit të jugut të Europës nga gazi rus.

Në organizatat ndërkombëtare, PD në qeveri ka mbështetur çdo rezolutë të SHBA dhe NATO për sigurinë në botë,” tha Sali Berisha duke përsëritur edhe sot se afera Basha me financimet ruse është personale, dhe PD kërkon rihapjen e hetimit.

“Lidhur me aferën Basha, deklaroj sa vijon: Në vitin 2018, ambasadori Lu më solli një dosje me shkrimin e portalit Mother Jones. Në dosje, përveç artikullit të revistës dhe një flete se Nick Muzin ishte i regjistruar si lobist i Bashës, nuk kishte asnjë dokument tjetër.

Lulzim Basha, i pyetur nga unë, më deklaroi se paratë e paguara për Nick Muzin, janë para të mbledhura në përputhje me rregullat në diasporën shqiptare në SHBA dhe se artikulli nuk ka asgjë të vërtetë. Midis artikullit të gazetës dhe shpjegimit të Bashës, unë kam besuar variantin e këtij të fundit. Më vonë jam vënë në dijeni të faktit se Basha mbahej peng me dosjen Muzin, dhe se çeshtja ndaj tij u mbyll në gjykatë me ndërhyrje të Agaçit, ku prokurori duke shkelur ligjin, nuk bëri rekurs në Gjykatën e Lartë, në kundërshtim flagrant me ligjin,” Berisha duke shtuar se këtë e kishte denoncuar si akt nga foltorja në foltore.

“Më vonë jam informuar se Basha kishte mashtruar dhe nuk kishte bërë mbledhje fondesh në diasporë. Pas këtyre informacioneve, burimi i parave mund të ishte rus, siç thoshte revista. Bazuar në këto informacione, më 4 prill të vitit 2022, kam denoncuar para jush financimin rus të Lulzim Bashës dhe mbylljen e dosjes nga Edi Rama. Rikthimi i kësaj çështje, provon atë që kam denoncuar disa herë, provon se Basha është mbajtur peng me këtë dosje dhe duhet të japë përgjigje për origjinën e këtyre parave.”

Me këtë rast, ai bëri të ditur dhe informacionet paraprake që ka dhe pse përgjegjësia është individuale, e Lulzim Bashës:

“Nga fondet që Biniatta ka dorëzuar te Nick Muzin, nuk kanë kaluar asnjë prej tyre nga arka e PD-së dhe fondet e PD-së. Për këtë arsye, përgjegjësia nuk është e PD, por është individuale e Lulzim Bashës dhe atyre që janë përfshirë në këto transaksione.

Duke u distancuar nga kjo aferë kryekëput e ish-kryetarit të PD, dhe duke u zotuar se do të ngrejë një komision auditi për të bërë transparencën e plotë, kërkojmë hapjen e një hetimi të plotë për të larguar çdo dyshim që lidh PD-në me dosjen ruse,” tha ai duke akuzuar Bashën:

” I kam deklaruar më herët se ai firmosi për të larguar Berishën nga PD dhe morri pjesë në skenarin e të shpalljes sime non-grata për qëllimet e tij. Paska qenë keqësisht i kapur dhe mendoi se në atë mënyrë do shpëtonte lëkurën e tij,” tha Berisha duke shtuar se i kishte deklaruar atij:

“Lulzim, kudo që të shkosh, para teje shkojnë dosjet e tua!”

Në fund, Kryetari i Partisë Demokratike akuzoi Edi Ramën se po sillet si agjent i Kremlinit.

“Gjithashtu, PD dhe Sali Berisha ka denoncuar, ka kundërshtuar me protesta të fuqishme, dhe dënon me forcën më të madhe orientimin serbo-rus të politikës së jashtme të Shqipërisë në kuadër të aleancës trelaterale Beograd-Shkup-Tiranë apo Ballkanit të Hapur.

PD dënon me ashpërsinë më të madhe, mbrojtjen absurde që Edi Rama i bën qëndrimit filorus të Beogradit, shndërrimit sot më shumë se kurrë pas agresionit barbar rus ndaj Ukrainës, të Serbisë së Putinit të Vogël, në një prapavijë shumë të rëndësishme të Moskës. Mbrojtja që i bën Edi Rama qëndrimit anti-sanksione të Beogradit për Rusinë, është në sintoni të plotë me mbrojtjen që i bën Vladimir Putini dhe është në kundërshtim flagrant me interesat e kombit shqiptar dhe interesat e rajonit dhe aleancës së Atlantikut,” tha Kryetari i PD, Sali Berisha duke përfunduar:

“Edi Rama sillet hapur si agjent i Kremlinit. Çfarë është kjo që del ky në çdo samit dhe i kërkon Serbisë, të mos respektojë sanksionet ruse. Serbia shërben si një prapavijë e fuqishme e Moskës. Si mundet një anëtar i NATO-s të mbrojë aksin Moskë-Beograd? E mbron se është i detyruar. Ndaj duhet të mësohemi të kërkojmë më shumë efekte, sesa gjëra konkrete. Ky bëhet avokat i interesave ruse në rajon, duke mbrojtur qëndrimin e Vuçiçit. Kush tjetër e mbron kështu Vuçiçin? Unë di miq të Vuçiçit që nuk e mbrojnë.”

Ndryshe, pas publikimit lajmit nga Zëri i Amerikës bazuar në raportin e shërbimeve inteligjente të SHBA, për infiltrimin rus në politikën e disa vendeve, dhe financimin e politikanëve në këto vende, ku përfshihet dhe financimi me 500 mijë dollarë të Ish-Kryetarit të Partisë Demokratike, Lulzim Basha, në zgjedhjet e vitit 2017, menjëherë ka reaguar Partia Demokratike duke denoncuar përdorimin e kësaj afere për marrjen peng të këtij individi me qëllim shkatërrimin e Partisë Demokratike ndërsa kërkoi rihapjen e çështjes e cila u mbyll nga Edi Rama.