Fitoi Kosova, humbi Vetëvendosje!
Kosova vazhdoi traditën e organizimit të zgjedhjeve duke ngelur model për Ballkanin dhe jo vetëm se si organizohen, administrohen dhe përfundohen zgjedhjet në çdo nivel. Të tilla ishin edhe zgjedhjet e djeshme lokale ku në kohë rekord me mbylljen e kutive të votimit filloi numërimi i votave për Kryetar të Komunave dhe shumë shpejtë edhe ato për Kuvendet Komunale.
Mëngjesin e sotëm Kosova është me një realitet të ri, me Kryetar të Komunave ose ata që priten të zgjidhen në balotazh për katër javë, dhe me Ish-Kryetar që u ndëshkuan për keqqeverisjen e pushtetit lokal.
Kjo është fitorja më e madhe e Kosovës!
Por nga ana tjetër, kemi dhe humbësin më të madh të këtyre zgjedhjeve, partinë që qeverisë Kosovën, Lëvizjen Vetëvendosje me Albin Kurtin!
Pse humbësi më i madh?! Jo pse PDK ka fituar në 4 komuna në garën për kryetar, jo se LDK dhe AAK kanë fituar nga 2 komuna në këtë garë, por se Lëvizja Vetëvendosje nuk arriti që në 38 komuna të gjejë as edhe një kandidat që do të filoj besimin e qytetarëve ndërsa ka partinë në pushtet e cila sot duhet të kënaqet me 12 komuna që vazhdojnë garën në balotazh!
Që humbja të jetë edhe më tragjike, Lëvizja Vetëvendosje me dorën e vetë humbë Prishtinën, Mitrovicën e Jugut dhe Kamenicën, dhe çon kot në balotazh Prizrenin, Gjilanin dhe Podujevën të cilat tashmë i ka shumë vështirë ti fitoj!
Fodullëku me Kryeqytetin i shkaktoi humbjen më të madhe Lëvizjes Vetëvendosje dhe nëse kemi parasysh 42.26 për qind të votave që mori kandidati i saj Arben Vitia derisa partia i mori vetëm 34.27 për qind për Kuvendin Komunal, mundësinë për të fituar lideri i saj Albin Kurti mund ta gjejë vetëm tek pazari me Gjakovën, Gjilanin ose Prizrenin sepse kandidati i saj Vitia tashmë ka dëshmuar se cila është vota e tij maksimale.
Përveç fodullëkut, në veçanti në Prishtinë, Lëvizja Vetëvendosje nuk ishte e vëmendshme as nga agresiviteti që kishin mediat kundër kësaj partie. Fitorja në zgjedhjet parlamentare dhe qeverisja me shumicën e vetmuar të pushtetit, janë pasuri që nuk i hynë në punë LVV-së e cila as sot nuk ka një medie që do ti pasqyroj punën reale të qeverisë, madje as televizioni publik i cili është kundërshtari më i madh i saj. Dhe, për këtë, sot, fajtori më i madh është lideri Albin Kurti; Ai, të cilit iu atribuua edhe fitorja prej 49.95 për qind në zgjedhjet parlamentare të 14 shkurtit 2021.
Humbja në Mitrovicën Jug është humbje e turpshme! Pse Albin Kurti përballë Ish-Ministrit të Financave dhe Guvernatorit të Kosovës kandidoi një analfabet funksional, këtë vetëm ai e di! Por, në gjuhën elektorale, kjo përkthehet se ai nuk e donte fitoren në këtë qytet, që është dhe më i varfëri në Kosovë! Kështu, Bedri Hamza i PDK, pavarësisht karrierës dhe individualitetit, për fitoren prej 53.86 për qind që në raundin e parë duhet ta falënderoj Albin Kurtin!
Balotazhi në Podujevë është humbje për mosrespektim të vetes së pari, kundërshtarit politik dhe pranimit të delirit të kandidatit Shpejtim Bulliqi. Kur ky njeri fitoi garën për Kryetar nuk e respektoi votën kundër Agim Veliut që i mundësoi fitoren por vazhdoi pushtetin me një delir të paparë duke harruar për folenë e LDK në atë vend. Ekrem Hyseni doli i pari në këtë garë vetëm pse nuk quhej Agim Veliu dhe kjo është e gjithë filozofia politike të cilën nuk e respektoi Bulliqi, LVV në Podujevë dhe Albin Kurti.
Votat për Kuvendin Komunal të Podujevës nuk tregojnë vetëm se LDK me 38.49 për qind është e para dhe LVV ka 37.4 për qind. Jo, por janë dëshmi se Vetëvendosje është në një rrugë qorre dhe fitorja ashtu si në Prishtinë mund të këmbehet me pazar nga një balotazh tjetër ndryshe Shpëjtim Bulliqi me delirin e tij mund ti kthehet hartave dhe përrallave me Malin e Zi sepse për fituar nuk ka as edhe një shans!
Humbja në Kamenicë është komike! Një kandidat i Lëvizjes Vetëvendosjes përballë një kandidati të saj që sot garon nën logon e Partisë Socialdemorate. Pse janë në balotazh Qendron Kastrati dhe Kadri Rahimaj vetëm ata nuk kanë faj, ashtu si dhe faktin se në garën për Kuvend Komunal, LVV ka 23.11 për qind dhe PSD 20.10 për qind!
Prizreni zyrtarisht shkon në balotazh por faktet tregojnë se Mytaher Haskyka doli pari me 40.12 për qind dhe Shaqir Totaj i PDK me 31.29 për qind, ashtu siç e kishin parashikuar sondazhet si tendencë, dhe nuk është ndërmarr asnjë masë. Nëse kësaj i shtojmë edhe faktin se në votën për Kuvend Komunal, LVV mori 28.43 për qind e PDK 25.82 për qind, atëherë rrugën e trasuar drejtë balotazhit për të bërë pazar, përveç Haskukës e ka “kërkuar” edhe Albin Kurti!
Për të ardhur në fund te Gjilani dhe Gjakova si histori në vete! Deri sa me Gjilanin u mor edhe Kryeministri Albin Kurti dhe arriti Alban Hysenin ta ngritë në kuotën 44.48 për qind, duke e lënë pas Lutfi Hazirin e konsumuar të LDK-së me 43.91 për qind, askush nuk u mor me sondazhet që publikonin pikërisht këtë realitet që çonte drejt balotazhit! Gjilani i LDK-së që përflitej si “legjendë urbane” edhe në këto zgjedhje nuk rezulton i tillë, dhe nuk i dha rastësisht LDK-së 39.34 për qind duke u rendit i pari, e duke e lënë shumë prapa LVV-në me 28.92 për qind. Vota e Hysenit, thjeshtë iu dhurua Albinit, e arsyen Albin Kurti mund ta gjejë në zgjedhjet parlamentare.
Në fund, pse kandidati ka rëndësi, dhe pse dështoi Albin Kurti me Lëvizjen Vetëvendosje me kandidatët për Kryetar komune përgjigjen mund ta gjejë në Gjakovë. 29.88 për qind të votave për AAK dhe 29.12 të votave për LVV-në që u dhanë për Kuvendin Komunal edhe mund të jenë reale por 37.08 të votave që iu dhanë kandidates së LVV, Mimoza Kusari i dedikohen figurës që ajo krijoi në këtë qytet si Kryetare e Komunës dhe është një maksimalizim i votës përballë një propagande shumë të egër kundër Lëvizjes Vetëvendosje në këtë qytet, duke sforcuar madhështinë e punës që bëri kryetar aktual i komunës Ardian Gjini me AAK, dhe nuk arriti të marrë më shumë se 46 për qind.
A mundet Ardian Gjini të fitoi në balotazh?! Shumë lehtë nëse LVV dhe Albin Kurti sillen si në Prizren ose edhe më keq si në Kamenicë!
Për fatin e keq të Lëvizjes Vetëvendosje, që vazhdon të funksionoj si Albin Kurti dhe jo si parti, balotazhi në Prishtinë mund të konsumoj shumë energji për fitore dhe ti rrëzoj ëndrrat e pjesës më të madhe nga 11 kandidatët tjerë që janë në balotazh, për të ngelur në historinë e zgjedhjeve lokale të vitit 2021 në Kosovë!
Fundi, a mund të jetë ndryshe?! Po, nëse ndryshojnë idetë e atyre që mendojnë për Lëvizjen Vetëvendosje dhe kanë guximin ta shohin në sy Albin Kurtin kur i flasin për mobilizim, tërheqje ose edhe pazar me partitë tjera që janë në garë. Ndryshe, çdo fitore në 12 balotazhet ku do të garojë LVV pas katër javësh, është meritë e rastësisë!
