FMN mbështet Kosovën me 260 milionë euro për energjinë e rinovueshme

Përmbyllen me sukses diskutimet për një program të ri mbështetës për Kosovën nga Fondi Monetar Ndërkombëtar me vlerë 260 milionë euro! Lajmin e ka bërë të ditur Ministri i Financave, Hekuran Murati pas takimeve në Washington D.C. bashkë me zëvendëskryeministrin Besnik Bislimi

Programi i ri, tha Hekuran Murati përmes rrjetit social Facebook, përfshin vënien në dispozicion fillimisht të shumës prej 80 milionë euro në kuadër të instrumentit më të ri të FMN-së të quajtur Resilience and Sustainability Fund, dhe me mundësinë e zgjerimit për edhe 80 milionë euro tjera.

“Në momentin e miratimit nga Bordi i FMN-së, Kosova do të bëhet vendi i parë në Evropë që do të përfitojë nga ky lloj programi me FMN-në. Mjetet nga programi RSF pritet t’i vihen në dispozicion Kosovës për investime në ndërtim të kapaciteteve të reja të energjisë së ripërtërishme me erë dhe diellore. Pjesa tjetër e mbështetjes do të jetë në formën e një Aranzhimi për Gatishmëri (precautionary SBA) në vlerë prej 100 milionë euro për 2 vitet e ardhshme,” thekson Ministri i Financave i Kosovës Hekuran Murati, duke e konsideruar pikënisje për këtë arritje, suksesin në konsolidimin e shpejtë të financave publike, dhe vendimmarrja e matur fiskale ndërsa përfundon:

“Kjo është edhe një dëshmi që reformat tona po vlerësohen edhe nga institucionet ndërkombëtare si FMN.”