Fort Campbell, përplasen dy helikopterë ushtarakë të SHBA
Dy helikopterë të Ushtrisë së Shteteve të Bashkuara u përplasën gjatë një misioni stërvitor mbi Kentaki, tha një zëdhënëse e Ushtrisë.
Guvernatori i Kentakit tha se pritet të ketë fatalitete, raporton RFE, dhe kërkoi nga publiku të luten për të gjithë të prekurit.
“I kemi marrë disa lajme të këqija nga Fort Campbell, pas raportimeve të hershme për një përplasje helikopterësh dhe priten fatalitete”, tha ai përmes rrjetit social Twitter.
We’ve got some tough news out of Fort Campbell, with early reports of a helicopter crash and fatalities are expected. @kystatepolice, @KentuckyEM and local officials are responding. We will share more information as available. Please pray for all those affected.
— Governor Andy Beshear (@GovAndyBeshear) March 30, 2023
Por, ende nuk është konfirmuar nëse ka pasur viktima nga ky aksident, sipas raportimeve nga Reuters dhe New York Times. Zëdhënësja e Ushtrisë, Nondice Thurman, tha në orët e para të së enjtes se nuk dihet gjendja e pjesëtarëve të ekuipazhit.
Incidenti ndodhi në orën 22:00 të së mërkurës (ora 4:00 e mëngjesit të së enjtes tek ne), kur dy ekuipazhe të ushtrisë amerikane po fluturonin me helikopterë të llojit HH60 Blackhawk.
Pas përplasjes, helikopterët raportohet të jenë rrëzuar në Trigg të Kentakit, në perëndim të bazës ushtarake Fort Campbell.
Ushtria lokale, raporton RFE, e ka konfirmuar se helikopterët e tyre ishin të përfshirë në këtë incident.
“Komanda është aktualisht e fokusuar në kujdesin për pjesëtarët e shërbimit dhe familjarët e tyre”, tha një zëdhënës i bazës ushtarake Fort Campbell për BBC-në.
