Forumi Ekonomik Delphi, Kurti: BE është projekti më i rëndësishëm i paqes, duhet ta mbrojmë

Bashkimi Evropian është projekti më i rëndësishëm politik i paqes dhe prosperitetit që nga Lufta e Dytë Botërore. Kështu u shpreh kryeministri i Kosovës, Albin Kurti gjatë fjalës së tij në Forumin Ekonomik të Delphit që po mbahet në Greqi duke shtuar se këtë projekt të rëndësishëm, duhet ta ushqejmë dhe ta mbrojmë.

“BE është projekti më i rëndësishëm politik dhe procesi historik i paqes dhe prosperitetit që nga Lufta e Dytë Botërore, të cilin ne duhet ta ushqejmë dhe mbrojmë. Në qershor do të bëhen njëzet vjet nga Samiti i Selanikut dhe premtimi për anëtarësim të Ballkanit Perëndimor. Për të bërë një hap të madh përpara, nevojitet një mendim i ri,” tha kryeministri Kurti pas fjalës së tij përmes rrjetit social Twiter.

Ndryshe, Kryeministri Albin Kurti po merr pjesë në Forumin vjetor Ekonomik, i cili organizohet nën kujdesin e Presidentes së Greqisë, Katerina Sakellaropoulou. Në këtë Forum po marrin pjesë politikanë e diplomat të ndryshëm.

Si pjesëmarrën në këtë Forum, Kryeministri Kurti zhvilloi takime gjatë ditës së premte edhe me Përfaqësuesin e posaçëm të Bashkimit Evropian për dialogun Kosovë-Serbi, Mirosllav Lajçak. Në këtë takim, sipas njoftimit për media, është diskutuar për takimin e radhës me 2 maj në Bruksel, ku në kuadër të dialogut Kosovë-Serbi, kryeministri i Kosovës do të takohet me presidentin e Serbisë, Alleksandar Vuçiç.