FOTO/ Poeti u var me firmën e babait të Kryeministrit, vendoset busti i Havzi Nelës në …

Nga dita e sotme, në oborrin e gjimnazit të Kukësit që mban emrin “Havzi Nela”, është vendosur edhe busti i martirit, një vepër e skulptorit kuksian Ilmi Hoxha.

Në ceremoninë e organizuar nga Bashkia e Kukësit, merrnin pjesë deputetë  të PD-së, prefekti i qarkut, familjarë dhe qytetarë.

Kryebashkiaku i Kukësit  Bashkim Shehu tha se falë guximit dhe sakrificës së tij sublime, Kukësi është në hartën e botës si qytet i poetit të varur në emër të lirisë.

“Përditë e më shumë Havzi Nela do të bëhet krenari për njerëzit që jetojnë në këtë qytet, për gjimnazistët që do te dalin nga gjimnazi i Kukësit që mban emrin e tij.

Falë tij, falë sakrificës së tij sublime, falë guximit e krenarisë së tij, Kukësi është në hartën e botës si qytet i poetit të varur. Bota ka qytete poetësh të pushkatuar, të vdekur burgjeve, të masakruar, por Kukësi është qytet i poetit të varur Havzi Nela.

Kukësi tashmë perveçse qytet i qëndresës së madhe të 1912, perveçse qytet i mikëpritjes së madhe dhe kandidat për Nobel në 1999, është edhe qytet i poetit të varur në litar në emër të lirisë, të fjalës së lirë”, tha Shehu.

Havzi Nela u burgos në vitin 1987 dhe më 10 gusht të vitit 1988 u var në qendër të qytetit të Kukësit. Vendimi për varjen e poetit u firmos nga Kristaq Rama, babai i kryeministrit Edi Rama.

Persekutimi i tij nisi në vitin 1967 kur si një mesues i ri dhe poet i talentuar, kundërshtoi kolektivizimin, ndalimin e besimit fetar dhe ndërrimin e veshjeve për gratë e fshatit.

Havzi Nelës i është akorduar titulli “Martir i Demokracisë” dhe “Nderi i Kombit”.