FSHF nuk njeh vendimin e Gjykatës, Armand Duka zgjidhet sërish President

Me 37 vota për, 2 të pavlefshme dhe 4 vota për Starovën, 43 delegatë nga 55 sa ka Asambleja Zgjedhore e Federatës Shqiptare të Futbollit, duke mos përfill vendimin e Gjykatës së Tiranës zgjodhi sërish Armand Dukën si President të FSHF.

Ndryshe, në prag të fillimit të punimeve të Asamblesë, kandidati për President i FSH, Dritan Shakohoxha, tha se bojkoton Asamblenë Zgjedhore duke e cilësuar si një farsë dhe të trukuar procesin zgjedhor, në të cilin është përgatitur gjithçka që Armand Duka të rizgjedhet për një mandat të gjashtë.

Përveç Shakohoxhës, në mbledhjen e sotme të Asamblesë Zgjedhore munguan të gjithë përfaqësuesit e bashkive, të cilat janë dhe drejtueset e klubeve në Shqipëri. Këto të fundit e kanë cilësuar garën jotransparente dhe procesin e trukuar. Përjashtim bëri vetëm kryebashkiaku i Kukësit, Safet Gjici.

Ndërkohë Asambleja zgjodhi dhe anëtarët e Komitetit Ekzekutiv: Arben Dervishaj, Lutfi Nuriu, Abdyl Kuriu, Ervin Canollari, Pano Xhixho, Fatbardh Jera, Anila Basha, Ylli Ҫekiҫi, Gjergji Petro dhe Envi Hicka.