Fundi i fillimit të Edi Ramës!

“Asnjëherë nuk do të arrish në fund të udhëtimit, nëse çdoherë ndalesh të pushosh një qen që leh!” me këtë thënie të Winston Churchillit e nisi sot ditën Edi Rama, një ditë pas protestës së suksesshme të Ilir Metës, i cili për  Kryeministrin aktual është shumë më shumë se sa një qen, dhe protesta shumë më shumë se sa një lehje.

Deri më sot, gjithmonë kur ka leh Ilir Meta ka pasuar një marrëveshje e madhe në mes kësaj familje të qenve komunist ndërkohë vetë Edi Ramën nga viti 1 Prilli i vitit 2013 e deri më sot, e kemi parë të merret edhe me qentë e Dumresë, Kasharit…

A thua është kjo arsyeja pse ai nuk do të mbërrijë në fund të këtij udhëtimi! Jo, dhe ky nuk është vetëm shqetësimi i Edi Ramës!  

Fundi i udhëtimit

Si do të arrijë në fund të udhëtimit Edi Rama kur ende është në fillimin e tij edhe pas shtatë viteve të qeverisjes, kur nuk ka bërë asgjë përveç se ka rrënuar dhe ato që ishin në ditën e marrjes së fronit të Kryeministrit në vitin 2013!

Edi Rama filloi qeverisjen me Ilir Metën dhe ndau në dysh Kombin me ndarjen e re territoriale të 31 korrikut 2014. Metës nuk i duhej “besëlidhja”, Edi Rama nuk dëgjonte lehje, dhe kështu u krijua një Shqipëri e ndarë me kujdes edhe në baza elektorale. Por Rama dhe Meta nuk u mjaftuan vetëm ndarjen e kombit në dysh!

Edi Rama e mori të ndërtuar Rrugën e Kombit dhe e ndau në dysh si rrugën ashtu dhe Kombin. Sot trau i Qet Kastratit përveç sinonim i plaçkitjes së kombit vazhdon ti ndajë shqiptarët pas shkeljes flagrante që bëri me koncesionin e famshëm për një rrugë të ndërtuar me paratë e këtij Kombi! Dhe, njeriun që sot e akuzon për lehje, ai heshti për traun sepse kishte marrë kockën e vetë dhe nuk i duhej “besëlidhja”.      

Sistemin Shëndetësor e mori në ndërtim e sipër dhe sot ai është në shkatërrim e sipër. Ndonëse njëri nga ministrat që krijoi këtë sistem shëndetësor ishte përzgjedhur nga vetë Ilir Meta, shkeljen që bëri vetëm me koncesionin e Dializës, ishte i mjaftueshëm për ti dhënë fund këtij Kryeministri që po shkatërronte gjithçka që i doli para, dhe plaçkitja ishte e hapur me ose pa PPP. Por Edi Rama nuk u përballë me “besëlidhjen” ndonëse shkatërroi dializën, sterilizimin, laboratorët dhe së fundi edhe spitalet, për ta përmbyllë shkatërrimin total të sistemit shëndetësisë.

Sistemin e Drejtësisë e mori me një Gjykatë Apeli kriminale dhe sot kemi këtë sistem të rrënuar ku i paprekur ngeli vetëm Apeli. Kur vuri dorë mbi Gjykatën Kushtetuese, Partia Demokratike u alarmua por jo dhe qeni të cilit Edi Rama i kishte vërë mikrofonin përpara në krye të parlamentit. U shkatërrua Gjykata Kushtetuese, u shmang përballja me gjyqet e Strasburgut për pronat dhe meqë ishin ku ishin në shkatërrim e sipër, u mbrojtën edhe nga zbatimi i Reformës në Drejtësi që mori dhen me shkatërrimin e gjithë sistemit nën ombrellën “vetting”. Po, u përballë me reagimin e fuqishëm të Partisë Demokratike por vetëm me “besëlidhjen” jo, sepse Ilir Meta ende nuk ishte bërë President.

E rrafshoi me tokë marijuanën dhe tokën e Lazaratit duke e përmbytë me marijuanë gjithë tokën shqiptare por nuk kishte “besëlidhje” që ta kundërshtonte sepse jo i gjithë përfitimi nuk ishte projektuar për Edi Ramëm. Partia Demokratike bëri denoncime të shumta, ky realitet përfundoi edhe në raportet ndërkombëtare dhe Kryeministri Edi Rama i papenguar e shpërbleu njeriun që nuk lehi, me postin e Presidentit.   

Ministri i Brendshëm, Fatmir Xhafaj identifikoi 40 banda të rrezikshme kriminale. Edi Rama shkarkoi ministrin që hapi gojën dhe themeloi OFL-në për të arrestuar jo ndonjërin nga pjesëtarët e këtyre bandave por botuesin Henri Çili. Për mosluftimin e këtyre bandave u alarmua vetëm Partia Demokratike, por nuk u pa të lehte dikush nga komunistët shqiptarë. 40 banda për 3 milionë banorë alarmuan edhe Bundestagun, por presidentit shqiptar nuk i duhej “besëlidhja” deri sa Presidenca nuk ishte e kërcënuar.

Më 2 Mars, kur bandat me shefin e tyre tashmë kanë prekur edhe zemrën e vendit, Presidencën, Ilir Meta reagoi, për Edi Ramën kjo është lehje, por nuk është e paparë dhe padëgjuar. E tillë ishte lehja edhe pas 21 Janarit 2011, kur për Ilir Metën në krye të Partisë Socialiste  ishte një fundërrinë, por kjo nuk e pengoi të ulet po me ketë fundërrinë në 1 Prill të vitit 2013 dhe të firmos marrëveshjen për ta rrëzuar qeverin e PD, dhe të krijojnë një koalicion qeverisës duke mbledhur gjithë qelbësirat e këtij vendi.

Sot, pas protestës së suksesshme që organizoi mbrëmë Ilir Meta, mbushi dhe sheshin kryesor të Tiranës, Edi Rama mund ti thotë ndonjërit prej militantëve të tij se ka ndërmend ta dëgjoj Winston Churchillin sepse asnjëherë nuk do të arrish në fund të udhëtimit, nëse çdoherë ndalesh të pushosh një qen që leh, sepse e ka të  qartë se ky ende nuk është fundi. Këtë e ka mësuar gjithashtu nga Churchilli!

Fundi i fillimit

Pas dështimit 7 vjeçar me qeverisjen socialiste dhe pa lehjen e Ilir Metës, sot Edi Rama e kuptoi se i ka ditët e numëruara dhe pse nuk do të arrijë në fund të udhëtimit: Çdoherë u mundua të pushoj qentë që i lehin përpara dritares. Korruptoi pronarët e mediave por pas 20 vjetësh ata nuk pranojnë kocka të viteve të mëparshme sepse oreksi i tyre është rritur ashtu si dhe kompanitë mediatike që kanë, dhe lehja është më e zhurmshme. Korruptoi partnerin qeverisës me ca kocka por harroi se ato nuk jepen për mëshirë por kanë çmim, dhe vlera varet nga vendi dhe niveli i heshtjes.

Sot Edi Rama ashtu si përherë e ka të qartë se e keqja e madhe nuk i vjen nga Ilir Meta, por ka përballë Partinë Demokratike e cila më e vendosur se kurrë i ka thënë: Ndalë!

Sot Edi Rama mund edhe të mos e pranoj këtë realitet duke u tallur me dekretet idiote të Ilir Metës por numërimi i ditëve të tij ka filluar me Reformën Zgjedhore. Fundi i organizatës së tij kriminale nuk është siç e ka menduar, por atëherë Edi Rama nuk e kishte lexuar Churchillin, lexonte Marksin dhe Leninin ashtu si dhe Ilir Meta.

Sot Edi Rama ashtu si në vitin 2003, e kuptoi por nuk e luftoi dot në pafundësi, se fundi i tij janë vetëm zgjedhjet e lira dhe të ndershme. Dhe, pas shtatë vjetësh në krye të qeverisë kur ende nuk ka nisur ta qeveris vendin, kur Reforma Zgjedhore po shkon drejt fundit dhe pritet një monitorim i fortë ndërkombëtar i procesit zgjedhor, Edi Rama e kuptoi atë që thoshte dhe Winston Churchilli:  

“Ky ende nuk është fundi. Nuk është as fillimi i fundit. Por ndoshta është fundi i fillimit.”

P.S.Para pak kohësh, kur Edi Rama nuk e kishte lexuar Churchillin shqiptarët kishin rastin ta shohin se si Kryeministri i tyre, përveç se me pronarët e mediave, çdoherë ndalej për të pushuar qentë që lehin!

Si në Dumre:

Ashtu dhe në Kashar: