Gjendet i vdekur Fadil Syleviç, policia jep detajet
Ish-Zyrtari i Policisë së Kosovës, Fadil Syleviçi, është gjetur sot i vdekur te Liqeni i Badovcit. Lajmin e ka konfirmuar zëdhënësi i Policisë së Kosovës, Bajram Krasniqi duke folur për njeriun i cili ishte thirrur si dëshmitar nga Gjykata Speciale e Kosovës në Hagë.
“Sot, më 15.01.2021, pak pas orës 14:00, policia është njoftuar për një rast që ka ndodhur në rrugën që shpie nga Mati për te liqenin e Badovcit, ku një person dyshohet se është pa shenja jete. Policia menjëherë ka dalë në vendin e ngjarjes, ka kontaktuar familjarët e personit, si dhe ka ftuar prokurorin e shtetit dhe ekipet e mjekësisë urgjente,” tha Krasniqi duke shtuar se ekipet e hetuesisë janë në vendin e ngjarjes.
“Ne vendngjarje mjekët kanë konstatuar se trupi i viktimës është i pajetë. Viktima është: F.S, mashkull. Ekipe të hetuesisë dhe krim-teknikës edhe në këto momente janë duke shikuar vendin e ngjarjes. Për informata të reja do t’ju njoftojmë me kohë.”
Për këtë rast është deklaruar edhe Kryeprorkuroi i Prokurorisë Themelore të Prishtinës, Kujtim Munishi.
“Prokurori është nisur në vendin e ngjarjes për të parë se çfarë ka ndodhur. Policia është në vendin e ngjarjes. Ai është gjetur diku në mal i vdekur.”
Ndryshe, Syleviçi ka qenë i thirrur si dëshmitar nga Gjykata Speciale e Kosovës në Hagë. Ai ishte pjesëtar i Policisë së Kosovës, ndërsa emri i tij është i njohur sepse ka qenë pjesë e akuzave publike. Vëllezërit Ramadani dhe Kiqina, të dënuar për vrasjen e pesë anëtarëve të familjes Hajra në vitin 2001. Ata e kanë akuzuar Syleviçin se ua ka montuar rastin.
