Gjyqtari i Apelit përballet me Vettingun, KPK zbardh skemën si përfitoi kredinë e butë duke…

Gjykatësi i Gjykatës së Apelit Tiranë, Ervin Metalla, u përball sot me Vettingun, në një seancë që drejjtohet nga Etleda Çiftja dhe me anëtarë Valbona Sanxhaktari dhe Xhensila Pine.

Në nisje të seancës, relatorja Pine tha se hetimi është shtrirë mbi kriterin e pasurisë.

Pine tha se sipas ILDKPKI nuk ka probleme me pasurinë e Metallës.

Por, KPK ka kryer hetim administrativ për kriterin e pasurisë. Hetimit iu nënshtruan pasuritë si vijon: apartament banimi 96 m katrorë me garazh blerë në Tiranë në vitin 2007 me burim kredi që është pasuar më pas me ndryshim të kontratës së kredisë duke ia kaluar vëllait.

Sipas KPK, Metalla ka vendosur një cmim prej 75 mijë euro të apartamentit që të përfitonte një mbulim të plote të vlerës së apartamentit se banka mund të financonte vetëm 70 përqind të vlerës. Më pas është ndryshuar kontrata e kredisë dhe ia ka kaluar vëllait shtëpinë dhe kredinë që të merrte kredi tjetër lehtësuese si i pastrehë.

Vetë subjekti e ka pranuar që shtëpinë e parë e ka kaluar në emrin e vëllait, por që përdorej nga vetë subjekti dhe ky kalim sipas KPK është bërë që të merrte kredi të butë.

Sipas KPK, paratë e marra nga kredia me kushte lehtësuese për strehim në vendin e punës, gjyqtari Metalla i ka kaluar në një firmë ndërtuese në Durrës ku punonte si gjyqtar. Më pas ai e ka kaluar në llogarinë e babait të tij duke anuluar kontratën e shtëpisë në Durres me firmën. Pra sipas KPK, Metalla ka marre kredi si i pastrehë dhe ka ndryshuar destinacionin e kredisë.

Vëllai i gjyqtarit Metalla ka dy apartamente 44 mijë euro dhe 55 mijë euro. Ka dhe një apartament blerë për 15 mijë euro dhe ia ka shitur gjyqtarit për 1.2 mln leke. Ai ka investuar për tre vjet në bono thesari dhe ka përfituar 141 mijë euro. Gjyqtari Metalla ka përfaqësuar me prokurë firmën Kamberi shpk në gjykatën e Strasburgut kur kësaj të fundit i është pezulluar aktiviteti në Shqipëri ndërkohë është e njëjta firmë që gjyqtari Metalla ka kaluar lekët e kredisë së butë dhe kjo firmë me pas ia kaloi babait të tij. Gjithashtu dëmshpërblimi që firma Kamberi fitoi në Strasburg ka kaluar në llogarinë e gjyqtarit.

Gjyqtari Ervin Metalla u shpreh në seancë se relatimi i Pines ishte i saktë,  por ka interpretime të ndryshme të fakteve.

“Ironikisht duket sikur unë i kam bërë kurth vetes sime duke marre kredi lehtësuese. Mendoni një cast sikur kjo kredi mos ishte marrë, në fund të dites unë do kisha si pronë vetëm atë apartament në Qytetin Studenti.

Megjithate unë jam i detyruar të jap shpjegime. Relatorja nuk e përmendi por kërkesën për kredi lehtësuese e kam kërkuar që në vitin 2006. Çfarë ka ndodhur, në fund të atij viti kur unë isha kryegjyqtar i Durrësit aplikova për kredi. Kam dorezuar kërkesat drejtuar zv.kreut të KLD, kryeministrit dhe ministrit të Drejtësisë.

Arsyeja ishte se ligji ishte i tillë që kërkesat për kreditë lehtësuese i miratonte kryeministri. Kjo ishte praktikë dhe kemi patur të drejtë të aplikojme. Në vitin 2008 ndryshoi kuadri dhe doli një VKM dhe futën në listë edhe gjyqtarët e Apeleve dhe të Rretheve. Unë nuk e di pse aplikimi im në 2006 nuk u procesua. Ministria e Drejtësisë e pranon që unë kam bërë kërkesë që në vitin 2006 por shpreh rezerva për arkivat.

Protokolli s’është mbajtur si duhet, por ne nuk e gjejmë dot kërkesën e zotit Metalla, ka thënë Ministria. Të njëjtën gjë thotë edhe Gjykata e Lartë. Edhe në këtë rast nuk është gjetur një kopje fizike e kërkesës sime dhe ky është problem institucional. Një indicie tjetër del nga Gjykata e Durrësit përmes një korrespondence me Ministrinë e Drejtësisë edhe pse nuk e gjejnë dot kopjen fizike.

Unë jam gati të mbaj përgjegjësi penale. Në rast se kam dërguar te ju materiale të falsifikuara. Unë kërkesën e kam bërë në vitin 2006. Unë kam dhënë vendime shumë të rëndësishme. Unë sot s’mbaj përgjegjësi për protokollet e institucionet zyrtare. Unë i qëndroj kërkesës që kam bërë për kredi. Në pritje të kësaj kredie aplikova për kredi tjetër në bankë”, sqaroi gjyqtari.

Metalla është ndër gjyqtarët e parë të Apelit të Tiranës që përballet me procesin e vetingut. Ai ushtron detyrën e gjyqtarit prej më shumë se dy dekadash, ku ka punuar fillimisht në Gjykatën e Elbasanit, ndërsa në vitin 2006 është emëruar kryetar i Gjykatës së Durrësit- detyrë të cilën e ka mbajtur deri në vitin 2013.

Në korrik 2013, Metalla u promovua në Gjykatën e Apelit Tiranë. Paralelisht me punën si gjyqtar, Metalla ka dhënë mësim si pedagog i jashtëm në Fakultetin e Drejtësisë si dhe ka drejtuar Unionin e Gjyqtarëve të Shqipërisë.