Gjyqtari i Krimeve të Rënda përballë Vettingut/ KPK: Nuk justifikon një apartament…

Gjyqtari i Krimeve të Rënda, Dritan Hallunaj, po përballet në një seancë dëgjimore me KPK në kuadër të proçesit të Vettingut. Hallunaj është i pranishëm vetë në seancë dhe pa avokat mbrojtës, ndërsa trupa gjykuese përbëhet nga Pamela Qirko, Suela Zhegu dhe Genta Tafa (Bungo).

Sipas raportit të paraqitur nga ILDKPI, Hallunaj ka bërë një deklarim të saktë të pasurisë, por sipas KPK-së, anëtari i gjzkatës së Krimeve të Rënda zotëron një apartament me vlerën e 49 mijë euro, të cilin nuk e justifikon. Apartamenti me sipërfaqe 160.5 m2 është blerë në 2005.

Gjithashtu në raportin e KPK-së, referuar informacioneve nga DSIK, Hallunaj nuk ka kontakte të papërshtatshme.

Gjyqtari Hallunaj është kandidati i fundit i Këshillit të Lartë Gjyqësor që përballet me procesin e vetingut. Nga lista prej 14 kandidatësh nga radhët e gjyqësorit, KPK ka konfirmuar 6 kandidatë, ka shkarkuar 5 dhe tre të tjerë janë ende në pritje të seancës dëgjimore apo të vendimit.

Referuar të dhënave të publikuara, Dritan Hallunaj zotëronte një pasuri prej 500 mijë lekësh në vitin 2003-kur deklaroi për herë të parë në Inspektoriatin e Lartë të Deklarimit dhe Kontrollit të Pasurive. Referuar deklaratës së vitit 2003, gjyqtari Hallunaj zotëronte vetëm një makinë.

Në fund të vitit 2017, pasuria familjare e gjyqtarit Hallunaj ka kapur vlerën e 13.4 milionë lekëve. Pasuria familjare e gjyqtarit të Krimeve të Rënda përbëhet nga një apartament në vlerën e 6 milionë lekëve, likujditete në bankë në vlerën e 5.7 milionë lekëve, 750 mijë lekë kursime në cash dhe automjet me vlerë 1 milion lekë.

Të ardhurat familjare të përfituara për periudhën deklaruese 2004-2017 janë 33.6 milionë lekë. Paga nga funksioni e gjyqtarit Hallunaj  përbën gati 60 për qind të të ardhurave totale, paga e bashkëshortes 14.3 për qind, ndërsa dhuratat në cash përbëjnë 21.4 për qind.