Video/ Kaliforni, luftë me zjarrin e tërbuar në 17 vatra, të paktën 8 vrarë…
Më shumë se 12.000 zjarrfikës kanë luftuar gjatë natës së të hënës duke u gdhirë e marta me 17 vatra zjarri në Kaliforni, që kanë marrë të paktën 8 jetë njerëzish dhe kanë shkatërruar më shumë se 1.000 godina banimi, bënë të ditur NBC News.
Zjarrfikësit gjatë natës kanë luftuar me zjarrin më të madh, të pagëzuar si Carrr, i cili ka shpërthyer më 23 korrik në qarkun Shasta, kanë bërë të ditur zyrtarët lokal.
Erërat e forta dhe moti i thatë vështirësojnë punën e zjarrfikësve.
Deri më tani janë djegur më shumë se 40.000 hektar sipërfaqe në qytetin Redding dhe rrethinë, ku jetojnë 91.000 banorë. Zjarri ka shkatërruar më shumë se 800 shtëpi dhe mbi 300 ndërtime të tjera.
Mbrëmjen e së hënës zyrtarët lokal theksuan se 23 për qind e zjarreve janë nën kontroll.
Mirëpo, temperatura në Redding arriti mbi 40 gradë celsius dhe pritet që kjo valë e nxehtit të vazhdoj gjatë gjithë javës, gjë që do të rritë kërcënimet nga zjarri.
Ndërkohë policia në Redding bënë të ditur se ka arrestuar pesë persona, të cilët gjatë evakuimit të 40.000 banorëve kanë plaçkitur shtëpitë e braktisura. Carr ka marr të paktën gjashtë jetë njerëzish, në mesin e të cilëve dy zjarrfikës dhe tre anëtarë të një familje.
Në afërsi të Parkut kombëtar Yosemite kanë humbur jetën dy zjarrfikës në zjarrin e pagëzuar Ferguson i cili ka shpërthyer më 13 korrik dhe deri mbrëmjen e së hënës ka djegur 24.000 hektar. Zyrtarët lokal kanë bërë të ditur se 30 për qind e zjarrit është nën kontroll.
“Gjithçka është ekstremisht thatë. Kjo është një recetë perfekte për një zjarr të madh,” tha zëdhënësja e zjarrfikësve të Kalifornisë, Amy Head duke shtuar:
“Kushtet klimatike edhe më tej do të vazhdojnë të pengojnë zjarrfikësit derisa vazhdojnë kushtet me temperatura të larta, mot të that dhe me erëra të forta.”
Dy zjarre kanë shpërthyer të premten në qarqet Mendocino dhe Lake, dhe deri mbrëmjen e së hënës kanë djegur 18.000 hektar. Zyrtarët lokal bëjnë të ditur se vetëm 5 për qin e zjarrit është nën kontroll.
