Glauk Konjufca: Qindra njerëz në Serbi po përgatiten për të sulmuar Kosovën

Institucionet e sigurisë kanë informacione të sakta se qindra njerëz në Serbi po ushtrohen dhe po përgatiten për një sulm të mundshëm ndaj Kosovës, tha Kryetari i Parlamentit, Glauk Konjufa, pas takimit me homologen slovene, Urska Klakocar Zhupançiç, ndërsa përsëriti se pa ndëshkimin e autorëve të krimit në Banjskë nuk mund të ketë fqinjësi të mirë

“Biseduam për bashkëpunimin e deritashëm dhe thellimin e këtij bashkëpunimi. Kryetaren Zhupançiq e njoftova për përparimin që ka bërë Kosova viteve të fundit. E falënderova që Sllovenia e përkrahu procesin e liberalizimit të vizave, e njëkohësisht e falënderova edhe për mbështetjen e madhe që na jep shteti slloven për anëtarësim në Këshillin e Evropës,” tha Glauk Konjufca duke shtuar se Kosova është në pritje të përgjigjes për statusin e kandidatit për anëtarësim në BE, duke qenë i vetmi vend i cili nuk e ka ende këtë status.

“Homologes sllovene ja shpreha shqetësimin tonë për tendencat destabilizuese të shtetit serb, që kulmuan me sulmin e egër dhe terrorist më 24 shtator, me ç’rast Serbia përmes një grupi të armatosur vrau rreshterin Afrim Bunjaku dhe plagosi dy policë tjerë. Nuk mund të flasim për fqinjësi të mirë pa u dënuar kryerësit e këtij krimi dhe pa u adresuar përpjekjet e tilla destabilizuese,” tha Konjufca duke fol dhe për informacionet që kanë institucionet e sigurisë së Kosovës.

“Ka informacione të sakta se një grup prej qindra personash sërish po e bëjnë të njëjtën gjë në Serbi, po ushtrojnë po përgatiten për ndonjë sulm eventual që mund ta përjetojmë. Por në jemi gjithmonë të përgatitur dhe institucionet tona të sigurisë janë në vigjilencën më të lartë!”

Në fund, Kryetari i Parlamentit të Kosovar tha se e ka njoftuar homologen e tij për qëndrimin parimor të Kosovës për një marrëveshje që duhet ta ketë njohjen reciproke në qendër si e vetmja rrugë për paqe të qëndrueshme në rajon, si dhe ka kërkuar heqjen e sanksioneve të Bashkimit Europian, duke pasur parasysh se Kosova i ka ndërmarrë  të gjitha veprimet për të përmbushur kërkesat e BE-së.

Ndërsa Kryetarja e Parlamentit të Slovenisë, Urska Klakoçar Zupançiç, tha se shteti i saj do të vazhdojë ta mbështesë fuqishëm Kosovën në të gjitha proceset drejt anëtarësimit në institucionet euro-atlantike.

“Kemi marrëdhënie të shkëlqyeshme dhe bashkëpunimi ynë është i kënaqshëm në aspekte të ekonomisë. Kuvendi ynë është i gatshëm që t’i ndaj praktikat e mira sa i përket eksperiencës që Sllovenia e ka me BE-në në përmbushjen e kritereve për anëtarësim. Kosova dëshiron të bëhet anëtare e BE-së dhe Sllovenia këtu mund ta ndihmojë shumë. Ne e mbështesim perspektivën evropiane dhe anëtarësimin e vendit tuaj në KiE dhe rrugëtimin tuaj në integrimet euroatlantike. Kjo është kyçe për mirëmbajtjen paqes e stabilitetit në Kosovë por edhe në rajonin më të gjerë. Përmbushja e marrëveshjes si pjesë e dialogut Kosovë – Serbi është kyçe për sukses. Dialogu është e vetmja rrugë përpara,” tha Zhupançiç ndërsa për këmbënguljen e autoriteteve kosovare që marrëveshja në Bruksel ta ketë në qendër njohjen reciproke, ai shprehu edhe gatishmërin e shtetit slloven për të ndihmuar.

“Po, kjo mund të ndihmojë nëse të dyja vendet e njohin njëra-tjetrën. Vendet fqinje mund të përpiqen të që të ndikojnë këtu. Ne, do të përpiqemi të ndikojmë në këtë drejtim dhe mendoj se njohja reciproke do të ishte shumë e mirëseardhur për të ardhmen. E dimë se ka pyetje të hapura për të dyja vendet dhe do të jetë e vështirë që ato të zgjidhen pa ndihmën e vendeve tjera. Vende kyçe të BE-së besoj do t’iu ndihmojnë në këtë aspekt.”

Në fund, Kryetarja e Parlamentit të Slovenisë, Urska Klakocar Zhupançiç, shprehu gatishmërinë edhe për të ndihmuar në njohjen e shtetit të Kosovës nga nga pesë vendet e BE-së që ende nuk e kanë njohur.

“Është e rëndësishme gjithashtu që vendet e treta ta njohin sovranitetin e të dyja vendeve, sepse atëherë të dyja vendet do të jenë në të njëjtin nivel. Nëse kemi vende të treta që nuk e njohin Kosovën kjo bëhet më e vështirë. Sllovenia e cila e njeh rajonin mirë, mund ta qartësojë situatën për vendet e tjera evropiane që nuk janë të familjarizuara me këtë rajon dhe nuk e kuptojnë historinë e përbashkët të këtij rajoni. Patjetër, se ne do t’i adresojmë të gjitha këto çështje dhe shpresoj se do të jemi konstruktiv në këtë drejtim.”