Global Fire Power: SHBA ushtrinë më të fuqishme në botë! Ku renditet Shqipëria, Kosova dhe Serbia që çirret se investoi 2.87 mld $

SHBA ka ushtrinë më të fuqishme në botë, derisa në Ballkan aty ku vetëm Serbia kërcënon me luftë dhe thotë se ka investuar në armatim 2.87 mld $, ushtria e saj është me e fuqishme dhe në vitin 2024 renditet e 56-ta nga gjithsej 145 shtete që ka përfshirë “Global Fier Power“.

Top 10-shja nuk ka ndonjë risi, pas SHBA renditet Rusia, pasuar nga Kina, India, Korea e Jugut, Britania e Madhe, Japonia, Turqia, Pakistani dhe Italia. Prej vendeve që aktualisht janë në luftë, Izraeli renditet i 17-ti ndërsa Ukraina në vendin e 18-të.

Ballkani sot u gëdhi me Serbinë e lumtur që “Global Fier Power” e vlerëson ushtrinë serbe më të fuqishme se atë kroate e cila renditet e 66-ta, sepse për të tjerat nuk e ka problem sikur kjo gjë dihet, dhe, këtë e publikon edhe mëngjesin e sotëm në televizionin publik serb, RTS.

E për Presidentin e Serbisë, Aleksandar Vuçiç, që vazhdon e përsërit se angazhohet për paqe dhe stabilitetin e rajonit, dhe vazhdon e armatos ushtrinë e tij, në të cilën nga viti 2014 deri në vitin 2023 ka investuar në pajisje ushtarake 2.87 miliardë dollarë, duke mos përfshirë këtu donacionet e Rusisë me avionë MIG 29, tanke T-72B1MS dhe mjete të blinduara BRDM-2MS, ndërsa pak ditë më parë gjatë vizitës në Shërbimin sekret të Ushtrisë së Serbisë paralajmëroi dhe një investim prej 740 milionë euro sepse Kosova është pajisur me 75 milionë dollarë armatim, Presidenti i Këshillit të Atlantikut në Serbi, Vladan Zhivuloviç e konsideron një populizëm që nuk ka lidhje me realitetin.

“Nuk kemi strategji për tu armatos e cila funksionon në aspektin operativ, blejmë nga Qipro helikopterë të vjetër e nuk kemi pilot. Krijohet bindja se kjo më shumë është për populizëm se sa që është praktike, thotë Zhivuloviç për të përditshmen serbe “Danas” duke shtuar se probleme është edhe fakti që Serbia shpresh furnizohet me armë dhe pajisje ushtarake nga palë që janë në konflikt, në Lindje dhe Perëndim.

“Kam dëgjuar vërejtje nga atashe të ndryshëm ushtarak se ne furnizohemi me armatim të ndryshëm dhe ky është problem, p.sh. blejmë helikopterë nga Franca e raketa nga Kina.“

Dhe jo vetëm kaq! Armatimi duhet të shërbej për mbrojtje, sepse një ushtri e fortë shërben për mbrojtje nga çdo agresion.

“Ne jemi të rrethuar nga NATO, nuk besoj se mund të kemi ndonjë shans nëse futemi në konflikt,” thotë Presidenti i Këshillit Atlantikut në Serbi duke marrë shembull konfliktin hipotetik në Kosovë ose Bosnje Hercegovinë, aty ku Dodik flet gjithnjë e më shumë për Republikën e pavarur Srpska.

“NATO është prezent në Kosovë dhe pjesërisht në Bosnje Hercegovinë. Sulmi mbi ushtarët e tyre do të thotë se ata duhet të mbrohen, në këtë situatë NATO do të aktivizohet,” sqaron Zhivuloviç.

Ndërsa Drejtori ekzekutiv i Këshillit për Politika Strategjike, Nikola Luniç, thotë se armatimi i Serbisë me vlerë rreth tre miliardë dollarë do të ishte normal sikur ajo të ishte në një rrezik lufte.

“Mirëpo, problemi është se Strategjia aktuale e sigurisë kombëtare dhe Strategjia e mbrojtjes nuk i japin opinionit publik kurrfarë indikatori mbi kërcënimet konkrete të sigurisë, dhe kështu vënë në pikëpyetje politikën e mbrojtjes dhe shpenzimet enorme për frunizim në fushën e mbrojtjes,” thotë Luniç duke fol për një situatë absurde ku Serbia flet për neutralitet ushtarak dhe ka përzgjedh integrimin europian.

Në këtë situatë, ai sheh dhe një problem, duke pasur parasysh mungesën e stabilitetit global dhe kaudrot serbe në ushtri.

“Teoria e luftës duhet ta ketë parasysh faktorin njeri sepse arti i luftës duhet të merret me jetën e përditshme, si dhe forcën morale të popullit dhe individit. Për fat të keq, vendimmarrësit në sistemin e mbrojtjes kanë në mënyrë autoritare privilegjet e postit, dhe përgjegjësitë i delegojnë pa egoizëm,” është i prerë Luniç duke folur për të përditshmen serbe “Danas” dhe i bindur se e gjitha kjo nuk bëhet me patriotizëm të kafeneve.

“Investimi në pjesëtarët e ushtrisë dhe aftësitë e tyre si dhe dijet bashkëkohore, me stimulim financiar dhe jo patriotizëm të kafeneve, është mënyra e vetme që të ndërtojmë forcën morale të kombit, institucioneve dhe individit.”

Dhe, ajo që nuk quhet Serbi në Ballkan, por, është në NATO, fillon me Kroacinë e cila renditet e 66-ta, Shqipërinë e 90-ta, duke vazhduar me Slloveninë e patrazuar në vendin e 91-të, Maqedoninë e Veriut e 110-ta, Bosnje Hercegovinën e 116-ta, Malin e Zi në vendin e 129 dhe Kosovën e cila dalëngadalë po ngritet me ushtrinë e saj e cila, sipas “Global Fier Power”, për vitin 2024 ka një ushtri që meriton vendin e 135-të!