Grabitja e dokumenteve të prokurorisë/ Berisha: Bashkëpunim i shkëlqyer mes narkopolicisë dhe narkoprokurorisë

Ish-Kryeministri Sali Berisha ka reaguar lidhur me grabitjen e dokumenteve të prokurorisë së Durrësit. Berisha shkruan në rrjetet sociale se korrieri u vodh nga kriminelët e qeverisë në bashkëpunim me prokurorinë e Durrësit.

“Operacioni “forca e krimit” godet sërish! Kriminelët e narkoqeverisë vodhën sot postën e prokurorisë në Durrës.

Bashkëpunim i shkëlqyer midis bandave të partisë, narkopolicisë dhe narkoprokurorisë me në krye Noriegen.

Ata ndoqën shembullin e narkopolicëve që vodhen 13 dokumenta top sekret në kasafortën me sekrete të narkoministrisë për të përshëndetur ardhjen e Xhafës në krye te saj. Narkohajnat javën e ardhshme ngrihen në detyrë!”, shkruan Berisha.

Dy persona të paidentifikuar grabitën sot materialet e Prokurorisë së Durrësit. Ngjarja ndodhi pranë Zyrës Qendrore të Postës në këtë qytet.

Korrieri i institucionit u sulmua nga dy persona pasi ka dalë nga posta. Grabitësit i kanë marrë materialet që ai kishte tërhequr për llogari të organit të akuzës.

“Më datë 08.05.2018, rreth orës 10:30- 11:00, në lagjen Nr.11, në afërsi të Postës në Durrës, shtetasi I.K., me punë korrier pranë Prokurorisë së Rrethit Gjyqësor Durrës është sulmuar nga dy persona të paidentifikuar , të cilët i kanë marrë disa materiale që i kishte tërhequr nga Posta.

Nga ana jonë po punohet intensivisht dhe po kryhen të gjitha veprimet e duhura hetimore në bashkëpunim me Prokurorinë e Rrethit Gjyqësor Durrës me qëllim identifikimin e autorëve, kapjen e tyre dhe zbardhjen e plotë të rrethanave të ngjarjes”, thuhet në njoftimin e policisë.