Greqia: Franca dhe Holanda kundër Shqipërisë dhe Maqedonisë në BE

Ministri i Punëve të Jashtme të Greqisë, Nikos Kotzias tha sot se Franca dhe Holanda me siguri se do ta kundërshtojnë çeljen e negociatave për anëtarësim të Maqedonisë dhe do ta hedhin poshtë kandidimin e Shqipërisë, në Këshillin e BE në Bruksel që zhvillohet këtë fundjavë në Bruksel, dhe samitin e BE të enjten dhe të premten e javës së ardhshme.

Kotzias gjatë konferencës për shtyp në Rodos  tha se dy vendet kanë parashtruar ankesa, shkruan e përditshmja greke “Kathimerini”, duke shtuar se shefi i diplomacisë greke kishte saktësuar që Gjermania, Danimarka dhe Luksemburgu në letrën e tyre kishin shprehur dyshimin se Shqipëria dhe Maqedonia kanë përparuar mjaftueshëm për të “merituar” çeljen e negociatave për anëtarësim, por që më vonë kanë tërhequr këto dyshime.

Parlamenti holandez të enjten ka votuar kundër kandidimit eventual të Shqipërisë, por që rasti i Maqedonisë trajtohet i veçantë, derisa deputetët gjermanë mbështesin negociatat e Maqedonisë por me kushte shumë të rrepta.

Ndryshe, Franca ka hedhur poshtë plotësisht kandidimin e Shqipërisë, ndërsa konsideron se anëtarësimi i Maqedonisë në NATO  për momentin është një “çmim adekuat”.