Grupi Parlamentar i PD, Berisha: Kryeçështja e këtij sesioni, farsa elektorale!

Çështja e parë ose kryeçështja e këtij sesioni duhet të jetë farsa elektorale, tha Kryetari i Partisë Demokratike, Sali Berisha, para Grupit Parlamentar të PD duke paralajmëruar dhe ngritjen e një Komisioni Hetimor pranë Parlamentit të Shqipërisë ndërsa për rritjen e rrogave tha se hapi i parë duhet të fillojë me vendosjen e minimumit jetik prej 200 eurosh.

“Për grupin parlamentar të PD-së, për deputetët e opozitës, çështja e parë ose kryeçështja e këtij sesioni duhet të jetë farsa elektorale maj 2023.

Kjo farsë elektorale ishte një proces, një etapë e re në procesin e shkatërrimit të kombit shqiptar.

Asnjë komb, historia ka faktuar se nuk zhvillohet pa liritë, të drejtat e tij themelore.

Në këtë kontekst, target ose objektiv kryesor për realizimin e këtij qëllimi është dhunimi i votës së lirë.
Ky dhunim është seria, por ky dhunim siç faktuan këto zgjedhje, njohu përmasa më të mëdha se kurrë ndonjëherë.

Në këto zgjedhje, si në asnjë palë zgjedhje të tjera në 32 vite, Kodi Zgjedhor, Kushtetuta e të drejtës zgjedhore, u shpall në krye të radhës kinezëri nga njeriu që do udhëhiqte operacionin e narkoshtetit dhe të karteleve të drogës kundër procesit të zgjedhjeve të lira për popullin e vet.

Por, jo më pak kriminal është dhe post 14 maji. Për herë të parë, ju mund të riktheni në memorie studio dhe debate televizive ku, njerëz me sy të mendjes së verbuar, bënin çdo gjë që të fshihnin, të maskonin blerjen masive të votës për herë të parë haptas, publikisht me vendime qeverie si kurrë ndonjëherë tjetër.

Propaganda qeveritare ia doli. Imagjinoni tani, në një anë 670 mijë zarfe me 50 mijë lekë secili, në xhepin e 670 mijë votuesve. Rritja e rrogave për 310 mijë punonjës, të gjithë këta së bashku të marrë, bëjnë 980 mijë zgjedhës të trajtuar në këtë mënyrë.

Në anën tjetër, fajin e ka Sali Berisha. Po ka njerëz më pa dinjitet se sa këta? Ka mercenarë më të shpifur, pseudointelektualë më mjeranë se këta? Të cilët, për definicion duhet të mbrojnë në një mënyrë ose tjetër, interesin publik.

Unë u ndala në këtë aspekt se ky ishte publik, këto zarfa ishin publike, nuk ishin të fshehta. Edi Rama për herë të parë kaloi në shpërndarje publike parash në fushatë.

Por për aspektin nën dorë nuk bëhet fjalë, se efekti Doshi ua ka verbuar mendjen. Doshi ngroh xhepin. E rrahu njëherë një gazetar Doshi në një hotel, i dola zot unë. Shkoi dhe ia mbylli gojën në mënyrën e tij.

Ndaj në studio nuk figuron. Se ai është Edi Rama. Doshi është Edi Rama, partia e të cilit u rrit me 220 përqind.

Prapë këtu, duan të bindin shqiptarët se fajin e ka Berisha, fajin e ka opozita,” tha Sali Berisha duke folur dhe për raste si Armando Prenga i cili është i lirë edhe pse dhunoi veteranin e PD-së ndërsa hetimin e rastit me Salvator Kaçin e mbylli Edi Rama.

“Çfarë po ndodh tjetër? Gjithçka drejtohet nga Edi Rama.

Është ushtruar një terror i egër policor dhe jo vetëm policor, por edhe nga administrata e shndërruar në polici politike në mbarë vendin.

Diku, diku me akte mundësisht vdekjeprurëse. Bernard Ndrecës duan t’i inauguronin fushatën duke i marrë shpirtin në Va të Dejës.

Dy ditë përpara votimit, avokatit të nderuar, një mbështetës veteran i PD-së në zonën e Kurbinit, grupi kriminal i ish-deputetit Armando Prenga, vetë Armando shkon i thotë: mos u merr me zgjedhjet.

Këtij njeriu të nderuar, ditën e diel, në krye të detyrës, krimineli Prenga i dërgon vëllain dhe e godasin në kokë, në brinjë dhe e shtrijnë përtokë.

Ku janë këta? Të lirë, pa u hyrë ferra në këmbë.

Stiven Faqolli, djalë 22 vjeç, komisioner në Përrenjas, goditet barbarisht nga kryeplaku dhe i biri, në qendër të votimit, përgjaket.

Ku janë agresorët e tij? Të lirë pa asnjë gajle, i mbron Edi Rama.

Po jap rastet flagrante.

Salvador Kaçi, një figurë kombëtare e sportit në Shqipëri dhe një eksponent i rëndësishëm i PD-së, qeveritar vendor e me radhë, i dalin vrasësit me maska në mes të rrugës, duke pasur edhe djalin me vete. Arrin me një manovër të shoferit të shpëtojë këtij atentati.

Nis një hetim edhe për faktin se i biri i tij ka nënshtetas amerikan. Por çfarë bëhet me hetimin? Hetimin e mbyll Edi Rama, i cili e quajti trillim, pretendimin se Salvador Kaçit.

Cili është qëllimi? T’u thotë policisë dhe prokurorisë prishni çdo provë.

Nuk ka marrje në mbrojtje më të hapur se kjo të kriminelëve,” tha Berisha duke paralajmëruar dhe ngritjen e Komisionit Hetimor!

“Ne kemi vendosur dhe do të vazhdojmë të ndjekim rrugën ligjore të trajtimit, krejtësisht pa asnjë lloj reflektimi tjetër, përveç atij që shprehu Edi Rama se Kodi Zgjedhor është kinezëri. Është kinezëri për KQZ-në, për gjykatën që ka ngritur, pa le më për SKAP-in e partisë që është institucioni më i skllavëruar.

Çdo padi e jona është hedhur poshtë me absurditet, pa asnjë bazë ligjore nga SKAP-i i partisë.

Për SKAP-in rëndësi ka urdhri i Ramës. Po marrim vetëm aktin e blerjes së votës me shpërblim, me ryshfet të 670 mijë zarfave.

SKAP-i thotë se kjo lejohet në zgjedhjet lokale pasi kështu ka thënë KQZ-ja.

A ka dhunim më flagrant të ligjit se ky?

Kushtetuta kurrë në asnjë vend nuk mund të ndajë blerjen e votës në zgjedhje të përgjithshme dhe në zgjedhje lokale, përveçse në Shqipëri. Këtë e sanksionon Edi Rama, që thotë se Kodi Zgjedhor është një kinezëri.

Të gjitha çështjet e dërguara, janë kthyer mbrapsht pasi porosia është e prerë. Ata mund të jenë vetëm mburojë e narkoshtetit, karteleve të drogës dhe bandave të tyre.

Prandaj, të dashur deputetë, duhet me urgjencë të përgatisim kërkesën për komision hetimor parlamentar për këtë farsë, më e turpshmja elektorale në historinë e Europës.

Ne po përgatisim raportin. Bota e krimit u vërsul e tëra kundër nesh.

U sollën bandat nga Dubai sepse i mungonin Durrësit, Lushnjes. U liruan nga burgu të tjerë. U përdor vota e të burgosurve për të marrë mandate.

Burgje që votonin 100 përqind, njëlloj si në diktaturë për qeverinë. Nuk kishte ndodhur kurrë.

Në burgun e grave në Tiranë, 45 vota për hajdutin Erion Veliaj dhe vetëm vota e vëzhguesit për Belind Këlliçin.

Ulsi Manja është një kriminel i pakorrigjueshëm elektoral. Ai ka përdorur administratën e burgut për të terrorizuar të burgosur. Të burgosurit për krime të rënda janë kërcënuar se në rast se nuk bindin, nuk garantojnë kaq vota në burg, do transferohen në regjim special.

Komisioni hetimor do i nxjerrë të gjitha këto. Të gjitha këto janë të dokumentuara, se si kanë vepruar këta bosë nëpër burgje për të siguruar votat nëpër burgje,” tha lideri i opozitës duke saktësuar se në krye të krimit elektoral qëndron Salillari me Rrok Gjokën, si dhe Belinda Ballukun e cila ka terrorizuar zonën.

“Në krye të krimit elektoral qëndron Salillari me Rrok Gjokën.

Salillari është kapur në flagrancë nga kandidati duke blerë vota.

Kurse Rrok Gjoka që ka 7 vite, merr në patronazh qendër votimi në Bulqizë dhe ndërhyn fuqishëm.

Belinda Balluku ka terrorizuar zonën. Në takimet e saj, delinkuentët ishin më të shpeshtit.

Ajo ndante qendër votimi me biznes. Në Klos, demokratët e kapën tjetrin që ndante paratë, policia e fshihte kriminelin elektoral.

Këto janë vetëm disa nga aspektet.

Në Librazhd, ndihmat ushqimore ndaheshin haptas në supermarkete nga ish-shoferi i Ballës dhe zyrtarë të tjerë.

Bandat u hodhën në një sulm të egër kundër votës së qytetarëve shqiptarë, të gjitha nën regjimin e Edi Ramës.

Ndaj ky komision, ka një detyrë shumë të rëndësishme. Ne do bëjmë gjithçka për t’i treguar shqiptarëve dhe botës të vërtetën e kësaj farse zgjedhore.”

Në fund, Kryetari i Partisë Demokratike, para deputetë të PD u shpreh qartë se hapi i parë drejt rritjes së rrogave duhet të fillojë me vendosjen e minimumit jetik prej 200 eurosh.

“Tani kam një problem me rendin e ditës. Çështja e rrogave.

Të dashur deputetë, unë do shpreh mendimin tim përpara jush.

Emergjencë e të gjitha emergjencave për mua është votimi i minimumit jetik.

Ne, duhet të votojmë minimumin jetik të përllogaritur nga Avokati i Popullit.

Avokati i Popullit ka përdorur ekspertët më të mirë dhe ka gjetur se minimumi jetik aktualisht në Shqipëri është 200 euro.

Ndaj dhe ne do të kërkojmë në mënyrë të prerë, hapi i parë drejt rritjes së rrogave duhet të fillojë me vendosjen e minimumit jetik.

E kemi premtuar edhe gjatë fushatës. Shqipëria i ka të gjitha kushtet për ta përballur.

Minimumi nënkupton që nuk ka shqiptar që nuk do ketë të paktën 200 euro për pagën e tij.

Nuk është e vërtetë se kjo është për 3 milionë shqiptarë, kjo është shtesë mbi pensionet, mbi ndihmën ekonomike, por kjo është plotësisht e përballueshme,” tha Kryetari i Grupit Parlamentar të Partisë Demokratike, Sali Berisha, duke përfunduar:

“Ndaj ne do bëjmë në parlament një betejë të fuqishme për të mos filluar nga rritja e rrogave për deputetët dhe ministrat, por duke filluar me minimumin jetik. Mendoj të përgatisim amendamentin dhe nesër kjo do jetë tema jonë kryesore në parlament.”