Grushta mjekut të urgjencës, shpallet në kërkim 45-vjeçari

Policia e Tiranës ka nisur procedimin penal ndaj 45-vjeçarit, i cili goditi një ditë më parë mjekun në Spitalin e QSUT.

Policia ka bërë të ditur se ditën e diele gjatë orës 13:30, shtetasi me inicialet A.M, banues në Tiranë ka goditur për shkak të detyrës mjekun e urgjencës. Pasi e ka rrahur mjekun e urgjencës, shtetasi 45-vjeçar është larguar nga spitali, ndërkohë që Policia po punon për gjetjen dhe ndalimin e tij.

Mësohet se A.M. ka shkuar për të bërë një gjilpërë, të blerë jashtë spitalit dhe që duhet ta bënte tek ambulanca e lagjes. Mjeku i ka thënë se duhet të presësh, pasi nuk je rast urgjent. Në këto kushte, pacienti e ka qëlluar me grusht doktorin.

Pas këtij akti ka reaguar Drejtoria e Qendrës Spitalore Universitare “Nënë Tereza”, dhe ministrja e Shëndetësisë, Ogerta Manastirliu, e cila thotë se ky është një akt barbar, dhe si i tillë kanosja për shkak të detyrës ndaj mjekëve, duhet të klasifikohet si vepër penale.

QSUT thekson se ky nuk është një rast i izoluar por është rast i përsëritur, që mjekë dhe infermierë të spitalit dhunohen.

“Një apel të fortë i bëjmë opinionit publik, të mirëkuptojnë dhe përkrahin bluzat e bardha gjatë punës së tyre, të cilët pavarësisht situatave të krijuara, në asnjë rast nuk neglizhojnë misionin human, atë të dhënies së ndihmës së parë dhe shpëtimin e jetëve njerëzore,” thuhet në ragimin e QSUT e cila i bënë thirrje organeve kompetente të zbardhin ngjarjen dhe autori të marrë dënimin e merituar.

Njoftimi i Policisë

Nga ana e Specialistëve për Hetimin e Krimit në Komisariatin e Policisë nr. 4,  filloi procedimi penal për veprën penale “Goditje për shkak të detyrës”,  në ngarkim të shtetasit A.M, 45 vjeç, banues në Tiranë

Ky shtetas rreth orës 13:30, të datës 10.02.2019, pasi ka shkuar për të vizituar një të afërmin e tij që ndodhej  i shtruar në  spital, në ambientet e urgjencës së Spitalit Infektiv, ka goditur me grusht për shkak të detyrës, mjekun e urgjencës.

Shërbimet e Komisariatit të Policisë nr.4, pasi kanë marrë njoftim kanë shkuar menjëherë në ambientet e urgjencës ku dhe kanë kryer të gjitha veprimet proceduriale.

Shtetasi A. M., pasi kishte goditur mjekun ishte larguar nga spitali dhe po vijon puna nga ana e Policisë për gjetjen dhe ndalimin e tij. Materialet proceduriale i janë përcjellë Prokurorisë së Rrethit Gjyqësor Tiranë për veprime të mëtejshme. �