Hajdutët Paqësor ndëshkojnë Opozitën e Dhunshme!
nga Agim Popoci
Ndërsa debati që nxiti një deklaratë në këtë fillimvit e kandidates për kancelare gjermane të Alternativës për Gjermaninë, AfD, Alice Weidel, se Hitleri ishte komunist, vazhdon, me argumente dhe kundërargumente, për Edi Ramën mjaftoi vetëm një protestë e Opozitës që të gjithë të pushojnë së kërkuari te ky njeri ndonjë elementë të voçkël edhe nga bota demokratike!
Këtu nuk i ndihmoi dot as ministrja e tij me Syrin e Kaltër mbi hartat e Butrintit, sepse sundimtarit të paradoksit tashmë po i humbet fuqia e manipulatorit, shumica e shqiptarëve po e injorojnë, nuk po ndihen fajtorë dhe nuk po marrin përgjegjësi për problemet që krijuan manipulimet e tij.
Belinda Balluku ishte fillimi i fundit të manipulimeve të Edi Ramës ku shqiptarët po shohin se si drejtësia e reformuar po përpëlitet që të kënaq orekset e hajdutëve të cilët ishin të bindur, se askush nuk mund ti kërcënoj me burg vetëm pse kanë vjedhë paratë publike të shqiptarëve.
I bindur se ky kërcënim, jo nga zorrët komuniste të drejtësisë së reformuar, GJKKO dhe SPAK, por edhe nga ata që mendojnë ndryshe nga Edi Rama, do të ndëshkohet nga kasta e tij e hajdutëve, me dhunë deri në shfrenim, Kryeministri i Ballukut dhe Agasit, as nuk e kishte menduar se protesta e 24 Janarit që u organizua nga Opozita, do të vë pikat mbi “i” jo vetëm për të vërtetën e manipulimeve të hyzmeqarit të George Sorosit, vjedhjes së pakontrolluar të parasë publike, por, edhe të vërtetën e të gjithë atyre shqiptarëve dhe jo vetëm, që hamendësuan nëse Edi Rama është diktator!
Deliri e tradhtoi kur pa se kishte njerëz që e besuan edhe fabulën me Presidentin amerikan Donald Trump që e kishte ftuar si njërin nga themeluesit e Bordit të Paqes! Me veshjen e petkut të Dados së evladit të presidentit amerikan, nuk u pa njeri që ta ngushëllojë, të gjithë e refuzuan jo vetëm pse Edi Rama ndryshoi rolin në këtë dramë; I paaftë për tu përballur me emocionet që i kishte shitur shumë kohë më parë si tronditje po me këta aktor në një dramë ndyrshe, zbuloi një kriminel jo vetëm që fut dorën në xhepat e qytetarëve, por edhe mashtrues të vetë atit të tij shpirtëror, George Soros, i cili i kishte besuar llafeve kur Presidenti Trump u ul në fron!
Përveç se në Bruksel dhe në Washington, edhe në Tiranë u krijua një realitet ndryshe! Përrallat me Saliun më nuk po zënë vend, askush nuk po e shikon më të virgjër dhe për fajtor Saimir Tahirin, Ilir Beqjen, Arben Ahmetajn, Ilir Metën, Erion Veliajn etj. sepse kupa e krimeve jo vetëm që është mbushur, por, po derdhet!
Drejt Kryeministrisë, të gjithë shqiptarët që u nisën në protestë mbrëmjen e 24 Janarit ishin ata që më së shumti i besonin vetes së vetë, sofrës që kishin bosh para fëmijëve, dhe, syve që ju mundësuan të shohin së fundi se si vjedhë Belinda Balluku dhe kush po e mbron, pa u entuziazmuar më për bisedat e regjistruara nga SPAK që dolën në pazar, sepse manipulimet e Edi Ramës prekën fundin ndërsa vjedhjet e kastës së tij kriminale kanë filluar numërimin mbrapsht edhe pse Gjykata Kushtetuese u ka zgjatur jetën paksa!
Por, fundi i kësaj proteste, përfundimi i fjalimeve ashtu si dhe pështyrëja e molotovëve dhe fishekzjarrëve mbi murin e godinës së turpit, solli një të papritur me thirrjen e spikerit për të vazhduar protestën para Parlamentit! Kur, spikeri i vuri drynin kësaj proteste, dhe hajdutët paqësor të Edi Ramës vlerësuan se protesta ishte e dhunshme, urdhëruan falangat komuniste që ishin aty për ndëshkim dhe jo për ruajtjen e rendit, të zbrazin gjithë arsenalin të cilin u kishte ngarkuar madhëria e manipulimit mbi kurriz; Momente, kur shqiptarët ashtu si e gjithë bota panë tmerrin me sy, një dhunë si kurrë më parë mbi protestuesit që tashmë po largoheshin!
I rrahu, i përçudnoi, i helmoi me gaz, i mbyti në hu, i prangosi dhe nxitoi të akuzoi se kush ishin ata rrugaç dhe mercenarë që kishin prish rendin dhe qetësinë publike para Kryeministrisë dhe Parlamentit, dhe, si të tillë ishin ndëshkuar me ndërhyrjen profesionale të policisë së shtetit të tij paradoksal!
Por, ishte vonë! Shumë vonë!
Shantazhi i tij emocional dhe roli i viktimës u refuzuan nga të gjithë, tashmë edhe nga miqtë e tij dhe mediat ndërkombëtare në një zë, që e dënuan dhunën e Edi Ramës ndaj protestuesve të Opozitës ndërsa i treguan qartë dhe kufijtë e tij të manipulimit, që ishin buka dhe gjella për sundimin e tij!
Sot, kur Edi Rama u pa të manipuloj në Izrael jo vetëm me fenë e të birit por edhe me Papën që e kishte pagëzuar katolik, manipulimi duhet të injorohet si akuzë ndaj këtij drejtuesi të bandës më të madhe që ka njohur deri më sot shteti i vjedhur shqiptar!
Të gjithë atyre ministrave me Kryeministrin e tij që mendojnë se kanë mbaruar punë me drejtësinë si për trafik ndërkombëtar droge, PPP, inceneratorë, rindërtim, leje të ndërtimi, AKSHI etj. duhet t’u bëhet e qartë se nuk kanë shpëtim!
Dhe, në fund, Belinda Balluku dhe Edi Rama duhet të kenë një proces gjyqësor të drejtë ku shqiptarët do të shohin se si ju është vjedhur paraja, jo për të ardhur PD në pushtet sepse këtë e vendos vota, por, që partinë kriminale, PS, e cila e ka sjellë në krye të shtetit një të çmendur për qëllimet e saj, të zhduket nga skena politike shqiptare, në mënyrë që një rast i ngjashëm të mos ndodhë më!
Ndryshe, historia ka treguar se të çmendur dhe kriminel, Partia Socialiste kishte dhe ka me shumicë ndërsa Sigurimi i Shtetit sërish do të kujdeset që pas Enver Hoxhës, Ramiz Alisë, Fatos Nanos, Ilir Metës dhe Edi Ramës, Hajdutët Paqësor të ndëshkojnë Opozitën e Dhunshme!
