Hap fushatën, Idrizi: PDIU kërkon bekimin e të parëve, të vijojmë të punojmë për kombin!
Duke hapur fushatën për zgjedhjet lokale të 14 Majit, Kryetari i Partisë Drejtësi Integrim dhe Unitet, Shpëtim Idrizi, u shpreh sot nga varrezat monumentale të Kllogjerit se PDIU sot si një forcë politike serioze kërkon bekimin e të parëve, martirëve të atdheut që të vijojmë të punojmë për kombin.
“Nisim sot një rrugëtim nga varrezat monumentale të Kllogjerit. Nuk ishte e lehtë për ne që ta nisim në këtë vend këtë fushatë politike. Por ne kështu tejkalojmë çdo keqdashje apo bestytni. Në fakt ky memorial dhe piedestal duhet të ishte ngritur nga çdo parti politike, nga çdo qeveri e për çdo trevë të Shqipërisë.
Sot kam vetëm një fjalë për të gjithë ata keqdashës që pyesin se çfarë kemi bërë ne për çështjen çame. Ju them ja ku e keni, atë që duhet ta kishte bërë çdo qeveri, u themi se këtë e kemi bërë ne. Për mua nuk ka krenari më të madhe sesa t’i shohim të rinjtë tanë që bërtasin fortë për origjinën e tyre fisnike. Po ju ça keni bërë për Çamërinë?” tha Shpëtim Idrizi duke shtuar se PDIU-së që doli e vetme, sot i kërkojnë llogari të majtë e të djathtë, se ku jeni.
“I drejtohem të gjithë atyre që PDIU i bëri drejtorë, zv.ministra, shefa, etj. Ku ishit deri dje, a ju njihte njeri? Ja keni borxh Çamërisë. Të kujtohen njëherë që t’ja zënë në gojë emrin e Çamërisë. Çamëria është si Miti i Sizifit që kam vendosur ta çoj në majën e malit. Sot ky gur i rëndë ka me mijëra duar që e mbartin.
Keni gojë të na zini ne me gojë, ne e kemi zanafillën për ta kthyer Çamërinë në një çështje kombëtare.
Ajo që kam parë me neveri nga politika e ditës, është frika dhe nënshtrimi ndaj një fqinji që nuk pranon që ky është shekulli ku të drejtat e njeriut janë të shenjta e nuk mund të nëpërkëmben.”
Gjithsesi, sot PDIU nis rrugëtimin nga varrezat monumentale të Kllogjerit sip parti serioze, tha Kryetari i Partisë Drejtësi Integrim dhe Unitet, duke përfunduar:
“Nuk e kam kuptuar kurrë sesi në atë sallë të Parlamentit, kolegët e mi propozojnë lloj lloj rezolutash, për krimet në Bosnje, deri në Kamboxhia, por nuk thonë asnjë fjalë për çështjen çame dhe të kujtojnë ata që u sakrifikuan që të mbetej kjo Shqipëri që është sot.
Sot vijmë si një forcë politike serioze. Sot trëndafilat e Çamërisë janë këtu me ne. Sot kërkojmë bekimin e të parëve, martirëve të atdheut që të vijojmë të punojmë për kombin.”
