Hapen korridoret ajrore Kosovë-Shqipëri

Ministri i Infrastrukturës, Liburn Aliu, ka bërë të ditur se Kosova i ka hapur korridoret ajrore me Shqipërinë.

Përmes një postimi në rrjetin social Facebook, Libur Aliu tha se fluturimet për në perëndim dhe anasjelltas shkurtohen për së paku 15 minuta.

“Sapo u hapen zyrtarisht korridoret ajrore me Republikën e Shqipërisë. Fluturimet për në perëndim dhe anasjelltas shkurtohen për së paku 15 minuta,” shprehet Ministri i Infrastrukturës, Liburn Aliu, duke përfunduar:

“Nga 1 janari bashkatdhetarët përveç që do të udhëtojnë pa viza, do të kursejnë edhe më shumë kohë.”

Ndryshe, që nga paslufta, më 1999, fluturimet nga dhe në Aeroportin Ndërkombëtar të Prishtinës realizohen vetëm përmes korridorit ajror që e lidhë Kosovën me Maqedoninë e Veriut.

Marrëveshja me Shqipërinë, për ta shfrytëzuar korridorin ajror të këtij vendi, është arritur në vitin 2020, dhe parashikon hapjen e dy pikave koordinuese ajrore, Kukad dhe Arbër, por Autoriteti i Aviacionit Civil të Kosovës, AAC, i cili menaxhon hapësirën e ulët ajrore të vendit, sqaron se marrëveshja nuk është zbatuar për shkak të disa procedurave teknike që është dashur të miratohen nga Shqipëria dhe misioni i NATO-s në Kosovë, KFOR.

Sot, përveç shkurtimit të fluturimit për të paktën 15 minuta, çmimi mestar i një bilete nga Kosova drejt të gjitha vendeve të BE-së pritet të bie deri në 6 për qind.