Aksident zinixhir në Turqi, 10 të vdekur dhe 59 të plagosur

Në aksidentin e rëndë të trafikut ku u përfshinë shtatë automjete në aksin Sakarya të autostradës Marmara Veriore në Turqi, humbën jetën dhjetë persona dhe 59 mbetën të plagosur.

Shtatë automjete, duke përfshirë tre autobusë dhe kamion, u përfshinë në aksidentin zinxhir në aksin Sakarya të autostradës Marmara Veriore në drejtim të Stambollit, raporton Agjencia turke e lajmeve Anadolu, AA.

Ekipe të shumëta mjekësore, zjarrfikës dhe pjesëtarë të Autoritetit të Menaxhimit të Fatkeqësive dhe Emergjencave të Turqisë, AFAD, janë në vendin e ngjarjes.

Për shkak të fatkaqësisë është ndaluar trafiku drejt Stambollit. Ekipet e AFAD kanë filluar të largojnë mjetet nga autostrada në zonën ku ishte mjegulla e dendur. Trafiku është devijuar drejt autostradës Anadollit, ndërsa trafiku në autostradën Marmara Veriore drejt Ankarasë po zhvillohet normalisht.

Ministri turk i Shëndetësisë, Fahrettin Koca, përmes rrjeteve sociale konfirmoi se 10 persona kanë mbetur të vdekur në vendin e ngjarjes, 59 janë plagosur prej të cilëve tetë në rrezik për jetën.

Ministri i Drejtësisë, Yilmaz Tunc, tha se kanë filluar hetimet për aksidentin e rëndë të trafikut.

Guvernatori i Sakaryije, Yasar Karadeniz, doli në vendin e ngjarjes ku deklaroi se në aksidentin zinxhir u përfshinë shtatë automjete.

“Vlerësohet se deri tek aksidenti erdhi pasi një automjet goditi kamionin. Më pas në automjet u përplasën mjetet tjera,” tha Karadeniz.