Haradinaj: Ta bëjmë Kosovën si Gjermania!

Kryeministri i Kosovës, Ramush Haradinaj tha se nuk dëshiron që të rinjtë e Kosovës të shkojnë në Gjermani e Austri, për një jetë më të mirë, por që dëshirojnë Kosovën ta bëjnë si këto dy vende.

“Ne jemi Evropë, Kosova është Evropë, na mungon lëvizja e lirë por edhe ajo do të vjen, por edhe lëvizja e lirë dhe mundësitë me lëvizë lirshëm janë mundësi me e pa se çka ndodh në vendin tonë e çka ndodh në vendet e tjera, por ne duhet të synojmë ta bëjmë jetën këtu, që rinia jonë të fokusohet, të vazhdojë brez pas brezi me zhvillu Kosovën. Dëshira jonë është më bë Kosovën Gjermani e Austri, e jo të rinjtë tanë me shku në Gjermani e Austri”, tha Haradinaj duke folur në 14 vjetorin e themelimit të Gjimnazit “Loyola”, në Prizren, ku tha se në këtë gjimnaz nxënësit e kalojnë e 100% testin e maturës, e kjo tregon sa të mirë janë ata madje janë të aftë të konkurrojnë edhe në tregjet jashtë Kosovës.

Ndërsa Arfons Stendrup, anëtar i bordit të ALG, tha se do të vazhdojnë të ofrojnë nxënësve një shkollim të mirë.

Nga Prizreni, Haradinaj falënderoi të gjithë që kanë kontribuuar në Gjimnazin “Loyola”, dhe ata që do të marrin përgjegjësi të reja.