Hashim Thaçi në Kosovë

Ish-Presidenti i Kosovës, Hashim Thaçi, po qëndron në Kosovë.

Arsye e kësaj vizite, mësohet të jetë gjendja e përkeqësuar shëndetësore e nënës së tij.

Nën masa të rrepta sigurie, Hashim Thaçi ka shkuar në orën 12:00 në shtëpinë e tij në Burojë të Skenderajt, aty ku ndodhet edhe nëna e tijë me shëndet të përkeqësuar.

Mësohet se Hashim Thaçit i është lejuar t’i takojë vetëm prindërit e tij dhe askënd tjetër prej anëtarëve të tjerë të familjes.

Ditë më parë, nëna e Ish-Presidentit të Kosovës, Hashim Thaçi, ishte liruar nga QKUK, ku ishte trajtuar për pesë ditë dhe tani është duke u trajtuar nga mjekët në kushte shtëpiake.

Hashim Thaçi pritet që gjatë ditës të kthehet në Hagë.

Ndryshe, aktakuza ndaj ish-krerëve të UÇK-së duke përfshirë Hashim Thaçin është konfirmuar nga Gjykata Speciale më 26 tetor 2020, por u bë publike një muaj më vonë. Ish-Presidenti i Kosovës u arrestua më 5 nëntor 2020 dhe mbahet në qendrën e paraburgimit në Hagë. Procesi kundër tij ka filluar Prillin e këtij viti!