Heshtja për strategun e kasetofonave dhe zhurma për dhëndrin e Trumpit

Kompania “Affinity Partners” me projektin e saj në ishullin e Sazanit përveç se i dha përgjigje gjithë dilemave se si i shpëtoi Kryeministri Edi Rama aferës “McGonigal”, me të zbuluar se pronar i kësaj kompanie amerikane është dhëndri i Ish-Presidentit Donald Trump, Dita e Verës mori flakë me benzinën që shpërtheu në media për shitjen e pronës kombëtare nga shteti i papërgjegjshëm dhe korrupsionin që mori përmasa miliarda dollarësh që vetëm një popull i varfër mund t’i imagjinoj!

Por, për çfarë prone kombëtare është fjala, për çfarë ishulli strategjik bëhet fjalë, dhe pse shqiptarët heshtin kur Edi Rama i falë strategut të shitjes së kasetofonave, Samir Mane, një tokë shumë të rëndësishme të bregdetit shqiptar dhe i bënë dhe tunelin deri te kompleksi i Manes në Palas, dhe merr flakë kur lajmet përtej Atlantikut që gatuhen për interes të fushatës zgjedhore flasin për ishullin me aq shumë legjenda, Sazanin!

Larg xhevahirit të kurorës së artë të turizmit në Mesdhe për të cilin flet Kryeministri Edi Rama, interesit të Jared Kushner për të investuar dhe përrallave me korrupsion të atyre që nuk e menaxhojnë dot shtëpinë e tyre dhe flasin për miliarda dollarët e këtij ishulli enigmatik shqiptar, këtu është vetëm një e vërtetë pavarësisht se çfarë sajon shtabi elektoral i komunistëve të Joe Biden në Amerikë!

Kur heshti Sazani…

Shumë legjenda të thurrura me kërcënime, heroizma, Enver dhe Hrushçov, mijëra e mijëra marinarë nën flamurin komunist, kanë bërë që për këtë ishull, të flitet jo vetëm për silure e nëndetëse, por edhe për JO-të e mëdha që u thanë imperalistëve e madje edhe sovjetikëve, kontrollin e hapsirës detare mu në pëllëmbë të dorës, dhe në fund fare, shuarjes së përnjëhershme;

Dhe ndërsa Sazani sot heshtë, para 60 vitesh janë thurrur edhe legjenda bërthamore. Shqipëria duhej “të zhdukej nga faqja e dheut” me goditje bërthamore sepse këtu ishte instaluar pajisje sovjetike anti-raketë. Kështu thuhet për planet e menduara deri në shkurt të vitit 1961 në SHBA; ndërkohë Enver Hoxha ishte duke bërë edhe hapat e fundit për të dëbuar sovjetikët në gusht të këtij viti, nga baza ushtarake detare e Vlorës. Administrata e John Kenedit që sapo kishte ardhur në pushtet, kontrolloi planet e paraardhësve, dhe natyrisht presidenti Kenedy e anulloi planin, ndërsa Xhaxhi dëboi bazën sovjetike dhe të bllokut lindor komunist nga Pashalimani. E legjenda thotë, që ajo që ndodhi në Washington dhe Moskë, në mesin e të cilave ishte Shqipëria, u evitua në saje të mençurisë së Enver Hoxhës dhe aplikimit të një strategjie të re: AS LINDJE DHE AS PERËNDIM!

Ndoshta sot për Sazanin nuk do të flitej për një pikë strategjike ushtarake, por turistike, nga e cila regjimi I Hoxhës nuk  dijti të përfitoi, sepse ishte i impenjuar për raketa dhe bunkerë pa fund, por historiografia komuniste na mëson se e gjithë bota na u paska vërtitë rreth këtij ishulli, e armët bërthamore nuk kishin se ku të shpërthenin përveç se në Sazan dhe Shqipëri.

Kështu, ajo që do të shkruan më vonë historiani i njohur amerikan i Luftës së Ftohtë Fred Kaplan  në librin e tij “The Wizards of Armageddon”, do të sqaroj legjendat e thurrura me ose pa dashje nga sigurimsat injorant të Enverit, që me thashetheme do të furnizohen nga Moska dhe Washingtoni.

Pra, Kaplan do të shkruaj se Robert McNamara me t’u bërë Sekretar i Mbrojtjes, më 4 shkurt 1961, u njoh me Planin Unik të Integruar Operativ në Komandën e Aviacionit Strategjik, SIOP – në Komandën e Aviacionit Strategjik. Në rast të një sulmi sovjetik konvencional në Evropë ose thjesht një sulmi të ngjashëm, Maknamara mësoi, se Plani 1-A i SHBA, alternativa e vetme e vërtetë për luftë të madhe bërthamore, që kishte të bënte me asgjësimin e çdo vendi komunist nga Polonia në Kinë.

Dhe ato që në Komandat ushtarake të shteteve të ndryshme, quhen analiza dhe plane, ato mjaftuan për propagandë dhe transformim për tregun politik. Duke pasur parasysh situatën aktuale të asaj kohe, ajo që sot mund të lexohet në lidhje me Plani 1-A që i jepte Presidentit katër opsione për goditjen e parë paralajmëruese mbi Bashkimin Sovjetik, Kinën dhe Evropën Lindore, nuk bëhet dot as film me të famshmin Agjent 007 dhe as përrallë.  Pra, me shpërthimin e kësaj Lufte të III-të, për të cilën është folur aq shumë thuhet që nëpërmjet Arktikut ishte menduar që me raketa dhe avionë bombardues të transportohen 3.423 armë bërthamore, me fuqi 7.847 megatonë, për të vrarë 285 milionë rusë dhe kinezë, dhe miliona më shumë në Evropën Lindore.

E gjashtëdhjetë vjet më pas, kur Sazani heshtë, theksohet 23 janari i vitit 1961 në Ishullin e Sazanit, në ngushticën e Otrantos u zbulua një grup anijesh të panjohura; Më 19 Shkurt, për herë të dytë u zbulua një grup anijesh të panjohura në ngushticën e Otrantos, por si në rastin e parë, nuk u morën kurrfarë masash për rritjen e gatishmërisë luftarake të flotës si dhe masa për zbulimin; E Shqipëria e Enverit, nuk ishte e uritur vetëm për bukë por edhe për armiq; e ndërsa Enver Hoxha shpik armiq dhe sulme nga jashtë, Komiteti Politik Konsultativ i Traktatit të Varshavës, vëren me keqardhje se kohën e fundit nga ana e Shqipërisë janë ndërmarrë disa hapa, që nuk u përgjigjen parimeve dhe dispozitave të traktatit të Varshavës.

Në bazën ushtarake-detare të Vlorës nga pala shqiptare është krijuar një situatë jonormale, e palejueshme mes shteteve-anëtare të Traktatit të Varshavës dhe që lidhur me këtë ul seriozisht gatishmërinë luftarake të kësaj baze. E gjitha kjo vjen pas letrave që shkëmbyen më 27 dhe 28 mars të vitit 1961, Kryekomandanti i Forcave të Armatosura të Bashkuara dhe Ministri i Mbrojtjes i Republikës Popullore të Shqipërisë mbi gjendjen e punëve në bazën ushtarake-detare të Vlorës në Shqipëri.

Dhe e gjithë vëmendja në këtë Mbledhje ishte përqëndruar nga deklaratat e Enver Hoxhës në Kongresin e IV-të të PPSH-së se gjoja ka pasur vend një sulm mbi Shqipërinë nga ana e Jugosllavisë, Greqisë dhe flotës VI të Shteteve të Bashkuara të Amerikës. Delegacioni shqiptar në mbledhjen e Komitetit Politik Konsultativ të Traktatit të Varshavës të zhvilluar në Moskë nuk kishte se si të përgjigjej ndryshe përveç se si kishte urdhëruar Enveri; Këtë e dëshmon edhe radiogrami i Enver Hoxhës  që kishte të bënte pikërisht me Letrën e Greçkos, Kryekomandantit të Forcave të Armatosura të Bashkuara.

“Letrën e Greçkos hidheni në shportë, përgjigjuni vetëm atyre çështjeve që ai edhe të tjerët do të shtrojnë në mbledhje. Prandaj fjalimi juaj duhet rishikuar në këtë dritë. Mos flisni të parët. Çështja e bazës.

Hidhni poshtë shpifjet dhe arsyetimet e tyre, përmendni dhe shpërndani promemorien tonë e të Andrejevit në lidhje me ngjarjet në bazë. Argumentoni çështjen nga ana politike-ushtarake, tregoni përgatitjen shembullore të marinarëve tanë. Lidhni kërcënimet dhe shantazhet e mëparshme të Hrushovit për këtë çështje dhe thoni se Qeveria Shqiptare nuk pranon tezat e mareshalit Greçko, pse janë pa vend.

Theksoni se çdo vendim që do të marrin në drejtim të tërheqjes prej tyre të mjeteve të bazës dhe të mosfurnizimit të saj me armatime sipas marrëveshjeve dhe kontratave, dobëson mbrojtjen e kampit socialist e të Shqipërisë dhe i bën krejtësisht përgjegjës,” thotë radiogrami i injorantit Enver Hoxha që nuk ka konkluzion ndryshe përveç se të këtij niveli:

“U thoni se në emër të Partisë dhe të Qeverisë, ne nuk pranojmë dhe do të votojmë kundër çdo vendimi që mund të merret kundër statuskuosë në bazë dhe mosrespektimit të marrëveshjeve midis Bashkimit Sovjetik dhe Republikës Shqipërisë. Na mbani në korent. Qëndroni në lartësinë e Partisë sonë.”

Dhe, atë që nuk e bëri Rusia dhe Shtetet e Bashkuara me armë bërthamore, do ta bëjnë në vitin e tmerrshëm’97, një grusht rrebelësh, që dijtën ti shkulin kabllon e furnizimit me korrent dhe tubin e ujit këtij ishulli të madh e strategjik, t’i marrin dritaret e vilave ku jetonin oficerët e lartë të edukuar dhe përgatitur në Bashkimin Sovjetik, e pse jo edhe godinës së Komitetit Qendror të Ishullit, Kinemasë e madje edhe baxhos që për shumë vjet i ushqejë me produktet bio-komuniste mbi 5000 banorët e këtij Ishulli.

Ky pra është Sazani, që sot është shumë afër syrit dhe thashethemeve, por jo edhe realitetit për ta shkelur, madje as atyre që për shumë vite dhe dekada shërbyen në këtë vend.   

Dhëndri i Trumpit

Sazanit i shkulën kabllon e furnizimit me korrent dhe tubin e ujit të pijshëm, por ai vazhdoi të heshtë ashtu siç heshti kur ushtria komuniste e Enverit propagandonte se po e ruan Shqipërinë nga armiku i jashtëm dhe i brendshëm, dhe, populli shqiptar e mori të mirëqenë.

Komiteti Qendror në ishull vazhdoi të jetë dëshmi e një epoke të errët që për fat të mirë sot nuk prodhon as marksist e as leninist, por as edhe injorantë që ishin të bindur se po mbronin dhe Ministrin e Mbrojtjes, Beqir Balluku, që kapardisej në ballkonin e vilës!

Sazani heshti edhe kur u bë pikë tranziti e prostitutave të shteteve ish-komuniste drejt Perëndimit nën kontrollin e ushtarëve italianë, ose dhe pikë e rëndësishme strategjike e trafikut të drogës, por prania e një investitori amerikan që mendon të përfitoj lekë dhe jo të shes dëngla, trazoi shumë ujëra; Aty ku ndaluan rrymat e Lindjes dhe Perëndimit, filluan të përplasen dallgë që vinin nga toka shqiptare ku thuhet se bëhet politikë plurale, por, për fat të keq komunizmi kutërbon!

“Ne nuk i kemi finalizuar këto marrëveshje, kështu që ato mund të mos ndodhin, por ne kemi punuar shumë dhe jemi shumë afër,” tha pronari i i kompanisë së investimeve “Affinity Partners”, Jared Kushner, kur tashmë u bë e qartë se kishte në dispozicion dy miliardë dollarë nga Fondi i Investimeve Publike të Arabisë Saudite, PIF, pa u specifikuar nëse fondet saudite do të përdoren për projektin.

Pasardhësi i diktatorit injorant Enver Hoxha, Kryeministri i Shkodrës, Himarës dhe gjithë Shqipërisë, Edi Rama, investimin e dhëndrit të Ish-Presidentit Trump, e cilësoi kthim të Sazanit në një xhevahir të kurorës së artë të turizmit në Mesdhe.

Por, u hodhën një lum akuzash për Sazanin strategjik, pronë kombëtare dhe korrupsionin nga të gjithë ata që në gjithë këtë kompleksitet e kishte dhe një pronë po aq të rëndësishme kombëtare ku të gjithë heshtën, sepse prona iu dha Samir Manes për të ndërtuar gjithashtu një resort turistik!

Dhe jo vetëm kaq! Heshtën edhe kur 18 marsin e dy viteve më parë, resorti elitar “Green Coast” buzë plazhit të kristaltë të Palasës në detin Jon i lajmëroi klientët e vet për shërbime ekstra në sezonin e ri turistik, mes të cilave dhe një pistë për ulje helikopterësh mbi guralecët e bardhë të Deltës së Përroit të Palasës! Por, mos harroni, Monument natyre i mbrojtur me ligj!

Dhe, pistën, denoncoi në atë kohë BIRN, e ndanë një kompleks godinash në ndërtim, të cilat parashikohet të shërbejnë si qendër shëndetësore, stacion policor dhe një pikë e kalimit kufitar në shërbim të turistëve elitarë të jahteve; Shërbime të reja që nuk janë investim i “Green Coast”, por, pjesë e projektit më të freskët të Fondit Shqiptar të Zhvillimit me një kosto për taksapaguesit shqiptarë prej 762 mijë euro.

Por dokumentet dëshmonin se ky nuk ishte investimi i vetëm me para publike në favor të resortit privat të grupit “Balfin” në pronësinë e biznesmenit Samir Mane.

Prej janarit 2021, kur vendi ishte mbërthyer nga vala e dytë e pandemisë së COVID-19, një tender tjetër me vlerë 4 milionë euro nisi të zbatohej paralelisht në të njëjtën zonë për ndërtimin e një moli me gjatësi 46 metra, një shëtitoreje, një parkim publik si dhe një rrugë me dy korsi prej 548 metrash.

Dy këto projekte që kryqëzohen pranë resortit “Green Coast” në plazhin e Palasës, u financuan nga Fondi Shqiptar i Zhvillimit me fitues kompaninë “Gjikuria”. Të dhënat e siguruara nga BIRN tregonin gjithashtu se punimet për këto projekte u nisën pa leje dhe po dëmtojnë në formë të pakthyeshme Monumentin natyror “Delta e Përroit të Palasës”, por të gjithë heshtën sepse politika heshti!

Jo se nuk ishin në dijeni, sepse nga tetori 2020 deri në janar 2021, Agjencia e Zonave të Mbrojtura në Vlorë u përfshi në një betejë për ndalimin e punimeve mbi monumentin natyror, por denoncimet e saj nuk u përfillën.

Kompleksi “Green Coast” shtrihet në një sipërfaqe prej 185 mijë metrash katrorë në plazhin dikur të virgjër që njihet si Dhraleo ose Rrugët e Bardha në Palasë. Në vitin 2015, ishte qeveria e Edi Ramës që i dha kompleksit statusin e investitorit strategjik në fushën e turizimit, dhe strategu i shitjes së kasetofonave shkriu talentin për të treguar se si ngritet një resort kur e gjithë infratsruktura garantohet nga shteti dhe politika e mileti heshtë!

A do të ndodhë kjo edhe me dhëndrin e Ish-Presidentit Trump në ishullin e Sazanit! Mjafton të ndalohet keqpërdorimi i mjeteve publike për llogari të Jared Kushner, sepse titullin e investitorit strategjik nuk ia jep dot injoranti Edi Rama, kur ai është i tillë pavarësisht se çfarë i ka premtuar kryeministrit shqiptar, ish-drejtori i agjencive amerikane të inteligjencës, Richard Grenell!

Dhe, pavarësisht nëse ka ndikuar Grenell ose Kushner që Kryeministri Edi Rama të shpëtoi nga akuzat në çështjen McGonigal për bëmat e ish-zyrtarit të lartë të FBI, si me frengun ashtu dhe pulën shqiptare në Amerikë e Shqipëri!

Në fund, legjenda me kërcënime e heroizma, madje dhe zgjedhje amerikane dhe përfitime të kryeministrit mund ti duroj edhe sot Sazani që të heshtë, por, e rëndësishme është që për rolin e Edi Ramës në Skandalin McGonigal në Shqipëri nuk duhet të heshtë asnjë shqiptar, sikur t’a mbyll gojën edhe Donald Trump nëse fiton zgjedhjet në SHBA!