Homazhe në Prekaz, 23 vjetori i sulmit ndaj Familjes Jashari
Në 23 vjetorin e sulmit nga forcat serbe dhe në shenjë nderimi për luftën heroike të Familjes Jashari, sot u bënë homazhe tek Kompleksi Memorial “Adem Jashari” në Prekaz.
Me këtë rast, kryetari i Komunës Skenderaj, Bekim Jashari, tha se kanë bërë nderime pranë varrezave të familjes Jashari, për t’a përkujtuar sulmin e dytë që i ishte bërë familjes Jashari, 23 vite më parë.
“Sot bëmë homazhe pranë varrezave të familjes Jashari dhe duke përkujtuar 23 vite me parë, 22 janarin e 1998-ës, Bëmë nderime së bashku me Shoqatat e Dalura nga Lufta e Ushtrisë Çlirimtare të Kosovës, po ashtu me ish-deputetin Bekim Haxhiu, i cili asnjëherë nuk është ndarë nga kolektivi i komunës dhe shumë qytetarë të cilët sot ishin bashkërisht,” tha Bekim Jashari duke përkujtuar edhe momentin e sulmit të dytë që ndodhi ndaj familjes Jashari, ku theksoi se pas 45 minutave luftim forcat serbe ishin zmbrapsur të mposhtur.
“Në atë kohë pas 45 minutave luftime që ishin luftime tinëzare, ishte edhe muaji ramazan, pas syfyri, u zmbrapsen të mposhtur forcat serbe, po mbetën të plagosur motra ime Besarta, dhe vajza e Rifatit, Ilirjana[…]Atë kohë axha Ademi, me një grup shokësh të vet ishin në teren, dhe nuk ishin në shtëpi, duke bërë punët si zakonisht që i ka pasur në atë kohë, me të dëgjuar krismat, vjen shpejt e shpejtë pastaj vetëm u tërhoqën forcat serbe.”
Homazhe tek varrezat e familjes Jashari bënë kryetari i Komunës së Skenderajt, Bekim Jashari i shoqëruar nga motra Besartë dhe Shoqatat e Dalura nga Lufta e UÇK-së.
Ndryshe më 22 janar 1998 në orët e hershme të mëngjesit, nga Fabrika e Municioneve të Gjuetisë, rreth 500 metra larg shtëpive të lagjes Jashari, kishin lëvizur forca të policisë serbe, të cilat ishin drejtuar kah Kulla e Jasharëve, për të sulmuar ata.
