Hyrja në Mbretërinë e Bashkuar, udhëtarët duhet të kenë teste negative

Të gjithë udhëtarët ndërkombëtarë së shpejti do të duhen të kenë teste negative të koronavirusit për të hyrë në Mbretërinë e Bashkuar. Njerëzit që mbërrijnë me avion, tren ose anije, përfshirë shtetasit e Mbretërisë së Bashkuar, do të duhet të testohen deri në 72 orë përpara se të largohen nga vendi ku janë.

Sekretari britanik i Transportit, Grant Shapps, tha se udhëtarët nuk do të mund të udhëtojnë pa pasur testin negativ.

Shapps tha se qeveria është shumë e etur për këto masa, për shkak të një varianti të ri të koronavirusit, të indetifikuar në Afrikën e Jugut.

Masat e reja, raporton RFE, pritet të hyjnë në fuqi në të gjithë Mbretërinë e Bashkuar javën e ardhshme.

Mbretëria e Bashkuar është vendi më i prekur në Evropë nga koronavirusi, me mbi 2.8 milionë të infektuar dhe mbi 78,000 viktima.

Kryeministri britanik, Boris Johnson, është zotuar se, nga 15 janari, në Angli do të jepen “qindra-mijëra vaksina” në ditë.

Mbretëria e Bashkuar e ka nisur procesin e imunizimit kundër koronavirusit më 8 dhjetor.