I dërguari i Serbisë në Kosovë, Johannes Hahn: Liberalizimi, data 2020 më realiste…

Erdhi nga Beogradi në Prishtinë, takoi krerët e Kosovës, tha se i kanë kryer të gjitha detyrat por nuk ka liberalizim të vizave deri në vitin 2020. Me gjuhën e përdorur në këto takime nuk ishte e qartë nëse bëhej fjalë për Komisionerin për Politika Evropiane të Fqinjësisë dhe Negociata të Zgjerimit, Johaness Hahn, sic ishte parashikuar me protokoll apo Të dërguarin e Serbisë në Kosovë që merakun kryesor e kishte taksën e vënë produkteve serbe 100 për qind.

“Kërkoj durim edhe për disa muaj, që shtetet anëtare të BE-së do të marrin vendim për vizat. Puna është kryer nga Kosova dhe ishte radha jonë të implementojmë dhe kjo ka nisur me raportin dhe është marrë Parlamenti, i cili ka vendosur me një shumicë. Tash çështja ndodhet në Këshillin Evropian, i cili merr më së shumti kohë për ta kaluar këtë hap të procesit dhe kam besim dhe se data 2020 është më realiste, por mos u mbani peng i numrave””, tha Hahn dhe pa fije turpi i doli nga goja edhe perspektiva evropiane dhe anëtarësimi i gjashtë shteteve të rajonit për të qenë pjesë e Bashkimit Evropian.

“Njëri ndër kriteret është zgjidhja e çështjeve të hapura, duhet të punohet në reformat për të ecur përpara,” tha njeriu që e kupton problemin e vizave dhe padurueshmërinë që kanë në Kosovë politikanët dhe qytetarët, por janë disa procedura dhe duhet kohë për të marrë vizat, nëse i marrin kohën që u është dashur Ukrainës dhe Gjeorgjisë.

Mirë kjo, por si është e mundur që edhe për liberalizimin e vizave, Serbisë nuk i është dashur kohë dhe ishte më e privilegjuara përkundër shumë problemeve që kishte me pasaportat biometrike, refugjatët nga Kosova dhe Srpska Krajina si dhe ata nga  Republika Srpska. Dhe, BE mbylli sytë. Por, kush t’ia thotë, liderët që në mendje kishin vetëm liberalizimin e viziave për të përfituar politikisht.

Dhe, përfundimi i kësaj vizite nuk do të kishte kuptim sikur I dërguari i Serbisë në Kosovë, Johannes Hahni të mos e shprehte zhgënjimin për vendimin e qeverisë për taksën 100% për produktet serbe.

“Ne jemi në dijeni me vështirësitë që janë në tregti, unë kam propozuar në të gjitha takimet e mia që të fokusohemi në çdo gjë për të zgjidhur problemet ne tregti për të dy shtetet.”

Haradinaj: Taksa hiqet kur Serbia ta njohë Kosovën

Mesazhi për vizat i Të dërguarit të Serbisë në Kosovën ishte i qartë për Kryeministrin Ramush Haradinaj, por edheh ky i tha qartë Hahnit se vendimi i qeverisë për produktet serbe mund të anulohet atëherë kur Serbia të vendos ta njoh Kosovën.

“Ne jemi të gatshëm të nënshkruajmë marrëveshje me Serbinë, ku do të përfshihet edhe Marrëveshja me Treti të Lirë me Serbinë”, tha ai pas pas takimit me Johaness Hahn ndërsa i heqi edhe merakun e tij dhe të Presidentit të Serbisë, Aleksandar Vucic lidhur me “krizën për barna” në spitalin i cili ndodhet në veri të Kosovës.

“Nëse Qeveria e Kosovës ka informata se ka ndonjë krizë të ndonjë produkt vital, ne jemi në gjendje t’i furnizojmë. Spitalet apo ambulancat, nuk do të ju mungojnë ilaçet, për të gjithë. DO të respektojmë vendimin e Qeverisë, dhe ky vendim mund të anulohet me rastin e njohjes së Pavarësisë së Kosovës nga Serbia. Ne do punojnë që tani për një marrëveshje gjithëpërfshirëse, për borxhet, të zhdukurit, të drejtat e komunitetit serb në Kosovë e plotë tema tjera e një nga to do të jetë edhe tregtia e lirë mes Kosovës dhe Serbisë.”

Pra, viza nuk ka por Haradinaj në konferencën e përbashkët me Hahn, pas një fjalori të ashpër u shfaq sikur ka mirëkuptim dhe ka shpresë se çështja e vizave për Kosovën do të futet në agjendën e Këshillit të BE-së.

“Këshilli ka mbledhje në çdo tre muaj. Nga BE-ja është një skepticizëm, ata japin shumë arsyetime, prej atyre që kjo është e logjikshme, se thonë se me Ukrainë e Gjeorgjinë ka zgjedhur një vit e gjysmë periudha kohore mes Komisionit dhe vendimit. Nuk përjashtohet që në një të ardhme të afërt, sepse Këshilli mblidhet çdo tre muaj, mirëpo nuk na japin një garanci se do të ndodh kësaj here,” tha kryeministri Haradinaj dhe i rikujtoi Të dërguarit të Serbisë në Kosovë, Johannes Hahn se Serbia dhe Bosnja i kanë bërë dëm shumë Kosovës dhe për këtë kanë marrë vendim për mallrat e këtyre dy vendeve.