IDF: Kemi vrarë tre komandant të Hamasit! Wafi: Janë vrarë 15 njerëz!

Tre komandantë të Hamasit janë vrarë deri sa operacionet tokësore vazhdojnë në Gazë, kanë konfirmuar Forcat izraelite të Mbrojtjes, IDF, ndërsa nga Palestina vijnë raporte për dhjetëra të vrarë dhe të plagosur.

Avionët luftarakë, nën drejtimin e IDF kanë shënjestruar militantët si dhe “infrastrukturën terroriste” në rajon, thekson IDF për operacionet e sotme ndërsa saktësohet se është gjetur gjithashtu “depoja e armatimit e cila ka goditur avionin e IDF”.

“Operacionet tokësore në Rripin e Gazës; IDF dhe ISA kanë vrarë tre komandantë të çetave të organizatës terroriste Hamas. Forcat e IDF vazhdojnë të veprojnë në Rripin e Gazës, duke drejtuar avionët të sulmojnë terroristët, infrastrukturën terroriste dhe lokalizojnë armatimin dhe pajisjet ushtarake,” thekson IDF përmes një komunikate duke mos saktësuar se cila pjesë e enklavës palestineze ishte në shënjestër të sulmit.

Drejtuesi i spitalit indonezian në Gazën veriore, Dr.Marwan Al-Sultan, tha për BBC se të paktën 10 njerëz janë vrarë gjatë sulmit ajror izraelit ndërkohë Ministria e Shëndetësisë në Gazë, që drejtohet nga Hamas, ka deklaruar se janë vrarë 12 njerëz.

Zëdhënësi i kësaj ministrie, Ashraf al-Qudra, deklaroi për Agjencinë e lajmeve AFP se përveç të vrarëve janë dhjetëra të plagosur.

Ndërsa operacioni vazhdon raportet për dhjetëra të vrarë në spitalin indonezian në veri të Rripit të Gazit, si dhe në afërsi të këtij spitali, janë nga më të ndryshmet.

Sipas Agjencisë palestineze zyrtare të lajmeve, Wafi, 15 njerëz janë vrarë duke përfshirë gra dhe fëmijë, pas bombardimeve të shtëpive në afërsi të spitalit Abu Youssef Al-Najjar në Rafah. Gjithashtu raportohet për dhjetëra të plagosur. 

Ushtria izraelite nuk i ka komentuar këto ngjarje.