Ilir Meta shfaqet në kafazin e gjykatës: Proces i turpshëm kundër shtetit shqiptar!

Sot Presidenti i Partisë së Lirisë, Ilir Meta, është shfaqur në daljen e parë publike pas arrestimit në kafazin prej xhami të GJKKO, me një fjalim me plotë akuza në drejtim të sistemit të drejtësisë ndërsa procesin kundër tij e cilësoi të turpshëm.

“Nuk jam unë në pozita të pabarabarta, por ata. Me shpifje dhe gënjeshtra, me kallëzues të rremë, një proces i turpshëm kundër shtetit shqiptar, jo kundër Ilir Metës. Ju ftoj nga sot deri në momentin e fundit, ju ftojë të ndiqni dhe transmetoni live të gjithë procesin. Ju garantoj se mbaj përgjegjësi për çdo veprim, akt dhe sjellje timen,” tha Ilir Meta nga kafazi duke kërkuar që seancat gjyqësore kundër tij të transmetohen live, në mënyrë që gjithçka të jetë transparente.

Lidhur me këtë çështje, ai iu drejtua ditë më parë me një kërkesë të veçantë edhe Gjykatës së Posaçme.

“Transparenca përpara qytetarëve shqiptarë dhe llogaridhënia është detyrim për çdo institucion dhe çdo funksionar publik,” u shpreh Ilir Meta përmes rrjeteve sociale.

Ndryshe, që prej 21 tetorit 2024, Ilir Meta nuk është shfaqur në publik, imazh të cilin shqiptarët e kujtojnë nga spektakli që ofroi pushteti i tij i dashur socialist me arrestimin e Ish-Presidentit dhe Ish-Kryemnistrit të Shqipërisë.