Incident në Shkodër/ Të rinjtë akuzojnë Rudina Hajdarin: Po i shërben Edi Ramës…

Sot Rudina Hajdari është përballur me një incident në takim me të rinjtë në Shkodër, në shkollën e gjuhëve të huaja “Shejnaze Juka”.

Në momentin kur deputetja Hajdari po fliste para nxënësve dhe stafit pedagogjik, i riu Fatjon Mani, pjesë e strukturave të FRPD Shkodër, iu drejtua Rudina Hajdarit duke i thënë se po i shërben Edi Ramës dhe se ishte turpi i shqiptarëve.

“A e njeh Azem Hajdarin? Ai ka luftuar për demokracinë, ti je duke kthyer komunizmin. Ti je shtojcë e Edi Ramës, je një turp”, i është drejtuar ai.

Hajdari: Ti je djalë i ri dhe nuk duhet të merresh me politikë. Ne jemi këtu për të festuar, a je nga Evropa apo nga je? Do bëhesh çun evropian apo jo?

Fatjon Mani: A njef Azem Hajdarin ?

Rudina Hajdari: Unë e njoh Azem Hajdarin e më vjen mirë që e njeh Azem Hajdarin

Fatjon Mani: Unë e njof Azem Hajdarin po se njeh ti. Ai ka luftu për demokracinë këtu, ti po lufton me sjell komunizimin. Shtojca e Edi Ramës je ti, ti je turpi i shqiptarëve. Je turpi i shqiptarëve”.

Rudina Hajdari: Të dashur nxënës dhe mësues, ajo që ndodhi tani është pikërisht cfarë bën politika sot. Ne na ndan mes PS dhe PD, ne nuk duhet ta lejojmë të na përçajnë. Ne jemi shqiptarë në radhë të parë.

Pas këtij incidenti deputetja Rudina Hajdari mbylli fjalimin e saj në aktivitetin me nxënësin e shkollës “Shejnaze Juka” në kuadër të Ditës Europiane të Gjuhëve të Huaja.