Institucionet e pavarura, kërkohet kalimi në sitë i administratës së punësuar

Administrata publike e punësuar pranë atyre që njihen si institucione të pavarura duhet të kalojnë në vlerësim sa i takon zbatimit të ligjit për nëpunësit civil.

Parlamenti ka kërkuar që kjo pikë të mbahet parasysh nga Komisioneri për Mbikëqyrjen e Shërbimit Civil gjatë këtij viti së bashku me një sërë aspektesh të tjera.

Konkretisht komisionerit i është kërkuar “të zgjerojë planin e mbikëqyrjes me institucione të pavarura, me qëllim që të mundësojë një proces vlerësimi të situatës së zbatimit të dispozitave të ligjit për nëpunësin civil në këtë tipologji institucionesh”.

Në hierarkinë insitcuionale në vend janë disa më shumë se 30 institucione që cilësohen të pavarur pasi janë të krijuara me ligj nga Parlamenti. I tillë është edhe vetë Komisioneri për Mbikëqyrjen e Shërbimit Civil ashtu si gjykatat, Banka e Shqipërisë, Kontrolli i Lartë i Shtetit. Avokati i Popullit, Komisioni i Prokurimit Publik apo Instituti i Statistikave.

Komisionerit i është kërkuar gjithashtu të monitorojë dhe luajë rol aktiv në skemën e administrimit të shërbimit civil në administratën vendore, konkretisht në ndërtimin e strukturës, përcaktimin e saktë të numrit të nëpunësve civil, qartësimin e pozicioneve të punës në raport me shërbimin civil.

Një tjetër detyrë është ajo që të mbikëqyrë institucionet e administratës shtetërore për përgatitjen e planit vjetor të pranimeve në shërbimin civil.

Kuvendi ka kërkuar që institucioni i KMSHC angazhohet në ofrimin e trajnimeve periodike për nëpunësit civil të njësive përgjegjëse në të gjithë institucionet e administratës publike e sidomos në bashkitë me një numër të kufizuar të banorëve, veçanërisht në institutet e ligjit ku hasen problematika.

Në një pikë të fundit është kërkuar që Komsioneri luajë rol aktiv në mbikëqyrjen e procedurave të rekrutimit, për pozicionet e punës që  kërkojnë një edukim arsimor në fushën e drejtësisë, duke marrë pjesë me stafin e institucionit gjatë intervistave të strukturuara me gojë dhe njëkohësisht të bashkëpunojë me Shkollën e Administratës Publike, për të ofruar trajnime specifike për të gjithë nëpunësit civil që kanë një profil arsimor në këtë fushë./Monitor/