Inteligjenca Artificiale në shtetin e Edi Ramës!

Inteligjenca Artificiale që nga ngjizja e saj u bë çështje e diskutimit si mrekulli por njëkohësisht edhe si shqetësim në integrimin e njerëzimit që tashmë është duke bashkëjetuar me teknologjinë edhe si ves!

Kuptimi i historisë së saj, zbatimit aktual, si dhe të mirave të saj potenciale ashtu si dhe mangësive, është thelbësore për të kuptuar ndikimin e saj në një shoqëri moderne.

Por, kur kësaj i shtojmë propagandën e shëmtuar të Edi Ramës që nga fillimi i këtij viti, duke përgatitur shoqërinë shqiptare se sa vende pune do të na mungojnë me aplikimin e saj, ilustrimin edhe deri tek opinioni i Fevzos, gjithçka bëhet komike, sepse askush nuk sheh asgjë tragjike kur shqiptarët tashmë jetojnë në një realiteti ku vetëm Kryeministri i tyre mburret me suksesin e e-albania, ndërsa për lehtësimin e jetesës, punës etj. për të cilat flitet për Inteligjencën Artificale ata i kanë të përmbledhura tek një njeri I vetëm dhe nuk u duhen pajisje: Patronazhisti!

Pak histori

Ngjizja eInteligjencës Artificale fillon që nga kohët e lashta dhe e gjejmë në formë të debateve filozofike mbi konceptin e krijimit të qenieve artificale. Mirëpo, si ngjizje formale e Inteligjencës Artificale mund ta konsiderojmë mesin e shekullit XX kur shkencëtarët filluan të hulumtojnë përdorimin dhe zhvillimin e sistemeve kompjuterike si dhe zgjidhjen e problemeve

Në vitin 1956, shprehja “Inteligjencë Artificale” është dëgjuar gjatë konferencës në Dartmouth Collegeu. Vetëm kjo ngjarje konsiderohet si fillimi i idesë moderne mbi Inteligjencën Artificale. Zhvillimi i mëhershëm i Inteligjencës Artificale përfshinte sisteme të ndryshme specifike që janë zhvilluar në mënyrë aktive gjatë viteve ‘70-të dhe 80-të.

Përparimet e sotme të kompjuterëve dhe algoritmet gjithnjë e më të komplikuara kanë sjellë arritje të reja në teknologjitë e rrjeteve të neuroneve (neuerla netëorks) dhe mësimit të thelluar (depp learning).

Për këtë arsye, Inteligjenca Artificale sot po zhvillohet me shpejtësi të paparë dhe me këtë ndikimi i saj shumë shpejtë po rritet në shumë sektorë të ndryshëm.

Inteligjenca Artificale na shfaqet në aspekte të ndryshme të jetës së përditshme. Është prezente si asistente virtuale, siç janë Siri dhe Alex, ku ndihmon në detyra të  ndryshme siç janë harmonizimi i orareve, marrja e informacioneve të ndryshme si dhe automatizimi i detyrave të caktuara.

Në shëndetësi, Inteligjenca Artificale ndihmon në diagnostifikim, zbulimin e ilaçeve dhe vetë personalizimit të mjekësisë. Industri të ndryshme ku janë të nevojshme shkathtësi financiare përdoret Inteligjenca Artificale, si dhe për zbulimin e e mashtrimeve dhe algoritmeve me qëllim të tregtimit. Makinat pa shofer, robotikë dhe sisteme të mençura shtëpiake janë shembuj të veçantë për përdorimin e Inteligjencës Artificale.

Mundësitë e ardhshme përfshijnë zbatimin e Inteligjencës Artificale në vëzhgimin e ndryshimeve të natyrës, hulumtimeve hapësinore si dhe përmirësimit të aftësive njerëzore.

Përparësitë

– Efikasiteti dhe automatizimi – Inteligjenca Artificale është shumë e dobishme me rastin e optimizimit të proceseve duke ulur kështu mundësinë e gabimit njerëzor dhe duke përmirësuar efikasitetin në detyrat sikur se janë analiza e të dhënave, prodhimi dhe logjistika.

Por sa vlenë kjo përparësi në shtetin e Edi Ramës kur nuk ka gabim njerëzor, por, gabim i vetëm është i një njeriu që sot është Kryeministër. Si detyra, analiza, prodhimi dhe logjistika, mirë ose keq, kanë vetëm një emër dhe Inteligjenca Artificale nuk do ti shërbej njeriu në këtë shtet aq sa i shërbejnë dy satelitët me të cilët u tha se do të ndalohet ndërtimi pa leje!

– Inovacioni dhe përparimi – Inteligjenca Artificale nxit inovacionin duke çuar në zbulime të mëdha në shumë fusha, duke përfshirë shëndetësinë, bujqësinë, transportin etj.

Nuk dihet se sa mund të ishte debatuar për këtë përparësi të Inteligjencës Artificale në shtetin e Edi Ramës, por kur e vë ministër Blendi Gonxhen, shqiptarët ngopen dhe nuk besojnë se ka zbulim më të madh. Çdo gjë mund të bëjë Inteligjenca Artificale por përmbytje të Tiranës siç bëri Gonxhja nuk ka as Inteligjencë Natyrale dhe as Inteligjencë Artificale që mund ta bëjë!

– Marrjen e vendimeve më shpejtë dhe me besueshmëri – Algoritmi i përdorimit dhe zhvillimit të sistemeve kompjuterike mund të analizojnë grupe të shumë të dhënave, duke mundësuar kështu marrje të vendimit më shpejtë dhe më saktë.

Kjo mund të quhet edhe përparësi në vende normale, por shqiptarët kanë për Kryeministër Edi Ramën që firmos vendime fap-fap-fap, kështu që më shpejtë nuk kanë parë as inceneratorët e botës e lëre më Inteligjenca Artificale!

– Përmirësimi i Sigurisë – Inteligjenca Artificale mundëson siguri më të madhe në mjedisin e punës, për shembull, në formë të mirëmbajtjes së parashikuar të pajisjeve duke ulur kështu mundësinë e fatkeqësive të shkaktuara me prishjen e pajisjes ose përmes uljes së fatkeqësive për shkak të përdorimit të makinave autonome.   

Po, po, por me siguri se të gjithë ata që janë angazhuar që Inteligjenca Artificale ta përmirësoj Sigurinë nuk kishin harxhuar mund dhe kohë sikur ta dinin se në këtë botë ka dhe njeri me emrin Taulant Balla, ndryshe, kjo gjë do ju duket punë koti. Por, ne shyqyr o Zot që e kemi Edi Ramën e nuk na duhet Inteligjenca Artificale, i cili na zbuloi Taon që Sigurinë nuk e ka për gjë, madje qesh si me avionë plotë me drogë ashtu dhe Toyota Yaris të mbushur me euro!

Mangësitë

– Uljen e numrit të vendeve të punës – Automatizimi i nxitur me Inteligjencë Artificale me siguri se do të sjellë humbjen e vendeve të punës në shumë sektorë, duke rritur potencialisht pabarazinë shoqëroro ekonomike.

Ky është problemi që trumbetohet nga mëngjesi deri në darkë me fillimin e vitit të ri nga mediat që ka në shërbim Edi Rama, duke shmangur faktin më të madh se pabarazinë shoqërore-ekonomike që krijoi pushteti aktual nuk ka Inteligjencë Artificale që mund ta krijoi!

Pastaj, atë që bota e quan humbje të vendit të punës nga Inteligjenca Artificale komunistët e kanë shpikur që në vitin 1944 dhe quhet largim nga vendi i punës i borgjezëve, kulakëve, me biografi të keqe dhe së fundi demokratëve të Saliut!

Po, aplikimi i Inteligjenca Artificale sërish mund të kërkoj reduktim të vendeve të punës, dhe sita e Edi Ramës do të vazhdoj ti zhduk nga faqja e dheut edhe ata pak demokrat të Saliut që për arsye të ndryshme sita e vitit 2013 nuk i kapi!   

– Problemi etik – Inteligjenca Artificiale do të sjellë dilema të ndryshme etike që lidhen me shkeljen e privacisë, njëanshmërinë e padëshiruar të algoritmit dhe vendimit autonom në fusha shumë të rëndësishme si zbatimin e ligjit dhe shëndetësi.

Kjo, edhe mund të ndodhë por kur për Kryeministër nuk ke Edi Ramën! Ndryshe privacia del sheshit siç u ndodhi shqiptarëve që kanë sot Patronazhistët dhe u thonë datën dhe këstin e kredisë që kanë për të paguar, nëse kanë harruar të votojnë, dhe për kujtesë u bëjnë me dije se pavarësisht votës që hedhin, partia e dinë se për kë kanë votuar dhe do ti raportojnë Edi Ramës.

Për ata që u krekosën me gurin dhe arrën e Patronazhistëve u kujdesën hackerët iranianë për të treguar se kush janë ata që vjedhin në këtë vend, kush janë ata gazetarë që paguhen nga Spitalet për të gënjyer për Edi Ramën, dhe si paguhen batonët e ballët e kësaj qeverie që asgjë propaganduese të mos jetë rastësi

Vendim autonom as në zbatimin e ligjit dhe as në shëndetësi nuk mund të ketë, kështu që përjashtohet dhe mundësia e aplikimit të Inteligjencës Artificale në këto dy fusha! Ndryshe, PD menjëherë do të shkëputej nga kthetërat e Lulzim Bashës dhe sejmenëve të tij dhe vula do ti takoj të zotit, Edi Rama do të ngelte pa votat e lulëve në parlament dhe anulimit të koncesioneve në Shëndetësi, që nuk ka as algoritëm as Inteligjencë Artificale që i koncepton!  

– Varësia dhe besimi – Varësia nga sistemet e Inteligjencës Artificale mund të sjellë deri te varësia e tepruar, duke e bërë shoqërinë jashtëzakonisht të lëndueshme në rast të prishjes së sitemit ose sulmeve kibernetike.

Por, kujdes, këtu flitet për shtete normale dhe jo ato të llojit të Shqipërisë ku qytetarët tashmë janë me varësi të tepruar nga Kryeministri Edi Rama nga i cili  nuk guxojnë të lëndohen, sistemi prishet vetëm atëherë kur ai urdhëron ashtu si dhe sulmet kibernetike për të cilat AKSHI nuk guxon as të flas pa marrë leje nga ai aqë kontrollon ujin, ajrin dhe tokën.    

– Pasoja e paparashikueshme – Vetë kompleksiteti i Inteligjencës Artificale mund të sjellë deri te rezultatet e paparashikueshme, duke krijuar shqetësim për shkak të pasojave të paqëllimshme deri tek të cilat përdorimi i Inteligjencës Artificale mund të sjell mungesë të përgjegjësisë e cila me vete mbartë vetë përdorimi i Inteligjencës Artificale.

Inteligjenca Artificale paraqet thikë me dy tehe, duke ofruar një potencial shumë të madh që njëkohësisht me vete mbartë sfida shumë të rëndësishme. Balancimi i përparësive të saj me shqyrtimet etike dhe rreziqet potenciale është thelbësore për shfrytëzimin e aftësive të saj për të mirën e njerëzimit.

Shqipet e malit që 20 vjet kanë parking me pagesë automatike, por, këtë automatizim e ka bërë nul njeriu që qëndorn tek trau për të mos iu dhënë mundësi qytetarëve të lodhen duke shtypur butonin të marr kartën e hyrjes; Dhe, mos o Zot ti tregojnë makinerisë bar kodin e faturës që kanë paguar, sepse traun në dalje e hap vetëm ai që ka ekskluzivitetin, jo makineria borgjeze.

Dhe jo vetëm kaq! Në aeroportin e Qetit ka dhe një çudi tjetër që lemeris botën! Deri sa bota ka automatizuar si kontrollin e bagazhit ashtu dhe biletës, Edi Rama u mburrë shumë me investimin teknologjik të Qetit ku kontrolli i biletës u bë në mënyrë elektronike, por jo dhe kalimi pa ta vënë xhaxhi i Kastratit në pajisje! Ç’e do pajijsjen kur duhet edhe një socialist të punësohet në Aeroport!

Ka nga ata rilindas që lodhin trurin se si nuk i sheh të gjitha këto marrëzira Edi Rama?! Po, ai, moj motër, është VIP dhe ka hyrjen e posaçme, aty ku as Qeti, as Policia e Shtetit dhe Inteligjenca Artificale jo se jo, nuk e kap, ndryshe si do të arratiset Arben Ahmetaj dhe hajdutët e këtij kalibri nga Shqipëria!

Një pasojë tjetër e paparashikueshme që Inteligjencën Artificiale e bënë të papërdorshme në shtetin e Edi Ramës është Vettingu në Drejtësi!

Si mund të kaloi vettingun një prokuror ose gjyqtar që nuk është komunist dhe në tri kriteret Inteligjenca Artificiale i thotë që je qelibar! Këtë sfidë shqiptarët në shtetin e Edi Ramës as që do ta përjetojnë ndonëse shumicën e veriorëve i kanë larguar nga sistemi i drejtësisë edhe kur detyrimisht nuk ishin me Saliun.

Thjeshtë, ashtu siç vazhdimisht përsëriste Kryeministri Edi Rama “Ne dhe Ata”, të gjithë ata studentë pasionant që mendojnë se Drejtësia është e drejtë edhe kur qeverisin komunistët nuk e ka të panjohur formulën e punësimit pa parë ëndërra me sy hapur mbi Inteligjencën Artificiale!         

E çfarë mund të presim ne nga njeriu që i nxjerr njerëzit në bulevard për tu vrarë vetëm që ai të vijë në pushtet, korrupton edhe agjentët e FBI për ta shpallur rivalin politik non grata, dhe në fund kur e sheh se ai prap ka mbështetës, e arreston me vendim gjykate duke i marrë edhe ajrin edhe fjalën. I mungon Inteligjenca Artificale?! Në asnjë mënyrë! Lum si na që e kemi Edi Ramën…