Intervistimet për SPAK, Besim Hajdarmataj para KLP

Këshilli i Lartë i Prokurorisë, KLP, ka vazhduar intervistimet e kandidatëve për SPAK, në kuadër të procedurës për krijimin e Strukturën e Posaçme Antikorrupsion, SPAK.

Fillimisht prokurori Behar Dibra nuk është paraqitur në Këshillin e Lartë të Prokurorisë për të zhvilluar intervistën në kuadër të krijimit të SPAK me arsyetimin se është i angazhuar me një proces gjyqësor.

Kandidati i radhës për intervistim para KLP-së ishte Prokurori i Krimeve të Rënda, Besim Hajdarmataj.

KLP e ka pyetur prokurorin për dosjet më të nxehta, ndër to dosjen “Shullazi”, “Tahiri” dhe “339”. EURALIUS dhe OPDATE e kanë pyetur prokurorin në veçanti për materialet e përgjimeve të publikuara nga gazeta gjermane “Bild”.

Prokurori është përgjigjur se përderisa Prokuroria për Krime të Rënda nuk ka pasur një sektor të vetin për përgjimet, atëherë është e vështirë të përcaktohet nga kush kanë dal ato.

Ndryshe, Prokurori Behar Dibra i cili nuk është paraqitur në Këshillin e Lartë të Prokurorisë ka kërkuar nga KLP që t’i caktohet një datë tjetër për të dhënë intervistën për vlerësimin e tij për Strukturën e Posaçme Antikorrupsion, SPAK.