Itali, Mattarella i kërkon “Zotëri Gërshërës” të formojë qeverinë e re

Presidenti i Italisë, Sergio Mattarella, kërkoi nga ish-ekonomisti i Fondit Monetar Ndërkombëtar të formojë qeverinë.

Carlo Cottarelli është bërë i njohur si “Zotëri Gërshëra” për shkurtimet e shpenzimeve publike në Itali, raporton BBC.

Emërimi i tij u bë pasi përpjekjet e dy partive populiste në Itali për të formuar qeverinë e koalicionit, dështuan. Nje zgjedhje kjo qe vleresohet si nje masë e përkohshme deri në zgjedhje të reja.

Kujtojme se dy fituesit e mëdhenj të zgjedhjeve – Pesë Yjet dhe Liga – kanë bërë përpjekje t’i bashkojnë forcat, por i kanë braktisur ato pasi presidenti i ka vënë veto zgjedhjes së tyre për ministrin e Financave.

Nderkohe mediat italiane, raportojne se Carlo Cottarelli ka pranuar emërimin nga Sergio Mattarella kreu i shtetit, per te formuar qeverinë.

“E pranova detyrën e formimit të një qeverie, siç më kërkoi Presidenti i Republikës. Unë jam shumë i nderuar si një italian dhe sigurisht që unë do t’i jap të gjitha. Unë do të prezantohem me një program që në rast besimi përfshin miratimin e ligjit të buxhetit dhe më pas parashikon shpërbërjen e Parlamentit dhe zgjedhje në 2019.

Në mungesë të besimit, qeveria menjëherë do të japë dorëheqjen dhe detyra e saj është organizimi per zgjedhjet pas muajit gusht”, tha ai.