Janar 2025, Tirana me kostot më të larta të jetesës në Ballkan

Nga 141 qytete evropiane, Tirana u rendit në vendin e 92 për kostot e larta të jetesës sipas indeksit të publikuar në këtë fillimvit nga “Numbeo”, një databazë globale që mat kostot së jetesës kudo në botë.
Sipas indeksit që i takon janarit 2025, Tirana është kryeqyteti më i shtrenjtë në Ballkan, duke lënë pas Serbinë, Shkupin, Sarajevën, Podgoricën, madje edhe Sofjen, Bukureshtin, Budapestin etj.
Indeksi i kostove të jetesës llogaritet si përqindje e kostos së New Yorkut. P.sh. kostot e jetesës në Tiranë janë sa 41.9 për qind e NY. Në Beograd kostot e jetesës janë sa 39.4 për qind e New Yorkut, në Podgoricë sa 35 për qind, në Sarajevë 33.5 për qind, në Shkup 31.7 për qind dhe Prishtinë sa 25.3 për qind.
Indeksi i kostos së jetesës merr në konsideratë kostot e qirasë, shpenzimet e tjera mujore pa qiranë, indeksin e produkteve ushqimore, çmimet e restorantit dhe indeksin lokal të fuqisë blerëse.
Kostoja e lartë e jetesës në Tiranë ndikohet më së shumti nga çmimet e produkteve ushqimore. Sipas “Numbeo”, më 2025 indeksi i çmimeve të produkteve ushqimore shënoi 42.5 për qind, çka do të thotë se një banor i Tiranës shpenzon në muaj sa 42.5 për qind e një banori në New York.
Kosto e ushqimeve ka një peshë të lartë në koston e jetesës në Tiranë, pasi ndryshe nga vendet e e tjera të Europës, shqiptarët çojnë më shumë se 43 për qind të të ardhurave mujore për blerjen e ushqimeve.
Teksa Shqipëria ka rrogat më të ulëta në Ballkan mesatarisht 30 për qind më të ulëta me të dhëna zyrtare, nga ana tjetër ka çmime më të larta të produkteve ushqimore.
Në anën tjetër, Shqipëria ka më të lirë indeksin e qirasë. Shpenzimet e një banori në Tiranë janë sa 13.6 për qind e një qytetari në New York.
Kostot e larta të jetesës në Tiranë në njërën anë kanë si shkak çmimet e larta dhe nga ana tjetër, të ardhura të ulëta për të përballuar blerjen e mallrave e shërbimeve.
Tirana bashkë me qytetin e Ukrainës, Dnipro u renditën më dobët nga të gjitha qytetet e tjera të Europës për indeksin lokal të fuqisë blerëse.
Në Tiranë fuqia blerëse është sa 43.1 për qind e mesatares së New Yorkut, ndërkohë që gjysma e qyteteve europiane kanë fuqi blerëse mbi mesataren e NY. Ndërkohë në Sarajevë, fuqia blerëse është sa 63.1 për qind e NY në Podgoricë është sa 62.4 për qind në Shkup 59.8 për qind Beograd 57.7 për qind dhe në Prishtinë 56.9 për qind
Tirana gjithashtu është më e shtrenjta në Ballkan pas Serbisë për çmimet në restorante.
Çmimet në Tiranë janë sa 39.6 për qind e mesatares se NY, ndërsa në Beograd 40.9 për qind, në Podgoricë 34.8 për qind, në Sarajevë 25.1 për qind dhe në Shkup 26.6 për qind.
Prishtina është më e lira me restorante që kanë çmime sa 21.8 për qind e mesatares së New York./Monitor/