Jared Kushner tërhiqet! A do ta padisë Vuçiç gjysmën e Serbisë?

Presidenti i Serbisë, Aleksandar Vuçiç, paralajmëroi ngritjen e kallëzimeve penale kundër të gjithë atyre që kontribuan në tërheqjen e dhëndrit të presidentit amerikan Doanld Trump, Jared Kushner, nga projekti i ndërtimit të hotelit në vendin e Shtabit të Përgjithshëm. Pyetja është nëse Vuçiç planifikon të padisë të gjithë qytetarët, studentët dhe opozitën që protestuan kundër prishjes së Shtabit të Përgjithshëm.

Siç tha Vuçiç, ai personalisht do të ngrejë kallëzime penale kundër të gjithë personave që morën pjesë në, siç tha ai, ndjekjen dhe shkatërrimin e investimit të Jared Kushner në vendin e bombarduar të Shtabit të Përgjithshëm në Beograd.

Vuçiç paralajmëroj ngritjen e kallëzimeve kundër të gjithëve në polici, prokurori, si dhe të gjithë personave të tjerë që, siç tha ai, kontribuan në shembjen dhe minimin ekonomik të Republikës së Serbisë.

Përveç pyetjes se kë do të padisë Vuçiç, nuk dihet nëse ka një bazë ligjore për një procedurë të tillë.

Prokurorja në pension Jasmina Paunoviç shpjegon për të përditshmen serbe Danas se kallëzimi penal, megjithëse një akt fillestar joformal që fillon procedurën penale, duhet të përmbajë emrin dhe mbiemrin e personit kundër të cilit ngrihet, si dhe një përshkrim të situatës faktike që duhet të konsiderohet vepër penale.

“Kallëzimi i ngritur nuk është i mjaftueshëm për të vepruar sipas tij. Gjithashtu, ai duhet të tregojë dëmin që është shkaktuar, kujt i është shkaktuar, si dhe kujt i është raportuar ndonjë përfitim. Për më tepër, vetë presidenti nuk specifikoi saktësisht se kundër kujt synon të ngris kallëzimin, kështu që do të interpretohej si një formë frikësimi i të gjithë aktorëve që ishin kundër projektit të Shtabit të Përgjithshëm,” thekson Paunoviç.

Ekspertja serbe e drejtësisë kujton se presidenti i Serbisë ka fyer, ushtruar ndikim të tepruar mbi prokurorët dhe policinë dhe u përpoq të drejtonte hetimin me rrëfimin e tij të pahijshëm, derisa u ngrit aktakuza në rastin “Shtabi i Përgjithshëm”.

“Tani, pasi kanë përfunduar veprimet procedurale dhe është ngritur aktakuza, ai po frikëson dhe kërcënon të gjithë ata që kontribuan në këtë procedurë penale, përkatësisht prokurorët dhe policinë. Nëse e dimë që këto institucione vepruan në përputhje me ligjin, se ato ekzistonin dhe i përmbaheshin kuadrit ligjor në punën e tyre, atëherë mund të themi se këto kallëzime, nëse dorëzohen, nuk do të kenë bazë ligjore”, përfundon Paunoviç.

Përveç qytetarëve dhe studentëve, përfaqësuesit e opozitës parlamentare dhe të qytetit gjithashtu kundërshtuan publikisht prishjen e Shtabit të Përgjithshëm, prandaj ata potencialisht mund të jenë nën sulmin e Vuçiçit.

Aleksandar Jovanoviç Çuta e pranon se ai ishte i pari që hasi dokumentin në të cilin Goran Vesiç, në emër të Qeverisë së Serbisë, kishte privilegjin të përmbyllte në mënyrë sekrete marrëveshjen me Kushnerin për ndërtimin e Kullave Kramp në vendndodhjen e Shtabit të Përgjithshëm.

Është e vërtetë që në fillim e shkatërrova atë projekt, e pengova dhe bëra gjithçka që të mos ndodhte. Është faji im”, tha Çuta duke e pranuar fajin dhe mezi pret që Vuçiç të ngrejë një padi penale kundër tij.

“Le të shihemi në gjykatë, pra të shohim se kush po e shkatërron shtetin dhe kush po e mbron atë. Çdo padi penale nga ana e tij është një nder për mua, vetëm kërkoj që të mos i shkoje nëpër mend të më falë, sepse personi që ai e fal nuk e ka fatin e mirë,” thekson Çuta.

Deputeti i Frontit të Gjelbër-të Majtë, Robert Kozma, thotë se ZLF është krenare për kontributin e saj në luftën për të ruajtur Shtabin e Përgjithshëm dhe të gjithë entitetin kulturor dhe historik.

“Ne do të jemi gjithmonë aty me qytetarët e Serbisë. Dhe nëse presidenti i Serbisë dëshiron të fillojë procedurat penale, le ta bëjë. Ne nga Fronti i Gjelbër-i Majtë nuk do të kërkojmë imunitet parlamentar”, thekson Kozma.

Ai shton se në muajt e fundit, ata kanë nisur procese të ndryshme për të mbrojtur trashëgiminë tonë serbe dhe jugosllave, perlën arkitekturore të Nikola Dobroviç, ndërtesën e Shtabit të Përgjithshëm, kazermën e Regjimentit të Shtatë, si dhe ndërtesën e vjetër të Shtabit të Përgjithshëm, dhe të gjithë entitetin kulturor dhe historik, përmes mjeteve institucionale dhe jo-institucionale.

“Ne i paraqitëm një propozim Gjykatës Kushtetuese së bashku me kolegët tanë nga grupet parlamentare në janar të këtij viti për të shpallur vendimin e parë të Qeverisë së Serbisë me të cilin ata hoqën mbrojtjen kulturore të paligjshëm dhe jokushtetues, sepse shkelën procedurën dhe falsifikuan nënshkrimet”, thekson Kozma.

Ai thotë se Fronti i Gjelbër-i Majtë ishte ndër të parët që vuri në dukje veprimet mashtruese të autoriteteve nga Ministria e Kulturës.

“Ne gjithashtu paraqitëm një propozim në Gjykatën Kushtetuese për të shpallur të paligjshëm dhe jokushtetues lex specialis për Shtabin e Përgjithshëm. Ne bashkëpunuam me ekspertë nga Akademia e Arkitekturës së Serbisë dhe Europa Nostra, ishim me qytetarët në rrugët e Beogradit duke mbrojtur Shtabin e Përgjithshëm,” përfundon Kozma për të përditshmen serbe Danas.

Ndryshe, më 15 dhjetor, dhëndri i Presidentit të SHBA-së Donald Trump dhe investitori Jared Kushner u tërhoq nga projekti i planifikuar i ndërtimit të hotelit në Beograd, pasi shkaktoi protesta për shkak të padisë kundër Ministrit të Kulturës Nikola Selaković.

“Meqenëse projektet e rëndësishme duhet të bashkojnë, jo të ndajnë, dhe nga respekti për popullin e Serbisë dhe qytetin e Beogradit, ne po tërheqim kërkesën tonë dhe po tërhiqemi në këtë kohë”, tha zëdhënësi i firmës private të investimeve të Kushner “Affinity Partners”.