Jep dorëheqje ministri i Shëndetësisë, Arben Vitia

Sot ministri i Shëndetësisë së Kosovës, Arben Vitia, ka dhënë dorëheqje për të vazhduar garën për kryetarin e Komunës Prishtinë si kandidat i Lëvizjes Vetëvendosje në zgjedhjet e 17 tetorit.

“Detyra e ministrit të shëndetësisë është në vetvete një detyrë me privilegj dhe përgjegjësi të lartë. Mua mu dha besimi nga kryeministri Kurti dhe pata privilegjin që t’i shërbejë me gjithë fuqinë që disponojë popullit që i përkas në një kohë të vështirë, të dhimbshme dhe me sakrifica. U jam mirënjohës për jetë për besimin e dhënë dhe mbështetjen e dhënë. Jo përvojë na ka transformua të gjithëve pa përjashtim. Por mbi të gjitha në aspektin njerëzor kjo ka qenë pasuria më e madhe që e kam përfituar si qenie njerëzore, mjek, si politikan, si qytetar i atdheut tonë të përbashkët,” tha Arben Vitia duke bërë të ditur se Ministria e Shëndetësisë tani do të udhëhiqet nga Zv/Ministrja Dafina Gexha ndërsa shtoi: 

“Unë nga tani e tutje do të jem pjesë e një ekipi tjetër, që ka në fokus kryeqytetin tonë!”

Ndryshe, zgjedhjet lokale në Kosovë pritet të mbahen më 17 tetor ndërsa përveç Vitisë, në garë për Kryetarin e Komunës Prishtinë janë edhe Uran Ismaili nga Partia Demokratike e Kosovës, Përparim Rama nga Lidhja Demokratike e Kosovës, Daut Haradinaj nga Aleanca për Ardhmërinë e Kosovës dhe Gëzim Mehmeti nga Aleanca Kosova e Re.