Kampionia olimpike largohet nga Irani, akuzon regjimin

Kimia Alizadeh, e vetmja femër fituese e një medalje olimpike në Iran, njoftoi se është larguar përgjithmonë nga vendi i saj për në Evropë.

“Më lejoni të filloj me një përshëndetje, një lamtumirë ose ngushëllime,” thekson 21-vjeçarja përmes rrjetit social Instagram duke shpjeguar pse po largohej.

“Unë jam një nga miliona gra të shtypura në Iran me të cilat kanë luajtur për vite me radhë”.

Alizadeh u bë gruaja e parë iraniane që fitoi një medalje olimpike pasi rrëmbeu medaljen e bronzit në taekëondo në kategorinë -57 kg gjatë Lojërave Olimpike në Rio 2016.

E njohur me dashuri në Iran si “Tsunami”, Alizadeh njoftoi se po linte vendin e saj të lindjes duke kritikuar ashpër regjimin në Teheran.

“Ata më morën kudo që të dëshironin. Unë vishja çfarëdo që të thoshin. Çdo fjali që më porositnin të thoja, unë përsërisja. Kurdo që e shihnin të arsyeshme, ata më shfrytëzonin. Unë nuk isha e rëndësishme për ta. Askush nga ne nuk kishte rëndësi për ta, ne ishim mjete,” shprehet e revoltuar Alizadeh, duke sqaruar se ndërsa regjimi festonte medaljet e saj, ajo kritikonte sportin që kishte zgjedhur:

“Virtyti i një gruaje nuk është që të zgjasë këmbët! ”

Mediat iraniane raportojnë se ajo është larguar drejt Holandës por ajo nuk specifikon vendin në të cilin ndodhet aktualisht.

Kryetari i Federatës së Takewondo të Iranit, Seyed Mohammad Pouladgar, pohoi se Alizadeh i kishte siguruar babait të saj dhe trajnerit të saj se ajo po udhëtonte për pushime në një udhëtim që ishte  paguar nga qeveria iraniane. Ai hodhi poshtë raportet për “arratisjen” e Alizadan, duke i cilësuar thashetheme të motivuara politikisht nga mediat e huaja.

Alizadeh konfirmoi “thashethemet” duke thënë se ajo “nuk donte të ulet në tryezën e hipokrizisë, gënjeshtrave, padrejtësive dhe lajkave” dhe se ajo nuk dëshironte të ishte në bashkëpunim me “korrupsionin dhe gënjeshtrat” e regjimit.

“Fryma ime e trazuar nuk përshtatet me lidhjet tuaja të ndyra ekonomike dhe lobet e ngushta politike. Unë nuk dëshiroj asgjë tjetër përveç Taekëondo, siguri dhe një jetë të lumtur dhe të shëndetshme”, tha ajo duke shtuar se nuk ishte  ftuar të shkojë në Evropë.

Ajo tha se vendimi për largimin ishte shumë më i vështirë se sa fitimi i medaljes olimpike ndërsa pëfundoi:

“Unë mbetem një vajzë e Iranit kudo ku jam!”