Kanabis në ballkon, arrestohet këngëtarja Enca

Operacioni policor i koduar “Balcony” u finalizua me arrestimin e këngëtares Enca nga Policia e Tiranës, pasi u konstatua se kishte kultivuar bimë narkotike në vazo, në ballkonin e banesës së saj në Lundër.

Ruensa Haxhia me rastin e arrestimit e ka pranuar para policisë së kanabisin e mbjellë në ballkonin e banesës e kishte për përdorim vetjak.

Në momentin e arrestimit, këngëtarja Enca ishte bashkë me të dashurin i cili u shoqërua në polici. 

Njoftimi i Policisë:

Finalizohet operacioni policor i koduar “Balcony”, për goditjen e veprimtarisë kriminale të kultivimit të bimëve narkotike. Kishte kultivuar bimë narkotike, në vazo, në ballkonin e banesës së saj, vihet në pranga 27-vjeçarja.

Sekuestrohen bimët narkotike. Shërbimet e Komisariatit të Policisë Nr. 1, në vijim të punës për goditjen e paligjshmërisë, pas informacioneve të siguruara nga inteligjenca policore, se një shtetase kishte kultivuar bimë narkotike, në ballkonin e banesës së saj, kanë organizuar dhe finalizuar operacionin policor të koduar “Balcony”.

Si rezultat i këtij operacioni u vu në pranga shtetasja R. H., 27 vjeçe, banuese në Lundër. Gjatë kontrollit në banesën e 27-vjeçares, në ballkon, shërbimet e Policisë gjetën dhe sekuestruan në cilësinë e provës materiale, bimë të dyshuara narkotike kanabis, të kultivuara në vazo. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.