Kancelari gjerman i tërheq vërejtjen Merkelit se po shpenzon shumë

Zyra e Kancelarit të Gjermanisë, Olaf Scholz, i ka tërhequr vërejtjen Zyrës së Ish-Kancelares Angela Merkel për shpenzime të tepruara që kjo zyrë i kryen, pasi Merkel u largua nga posti i kancelares në dhjetorin e vitit kaluar.

“Janë zhvilluar bisedime në mes të Zyrës së Kancelarit dhe Zyrës së Angela Merkel që bazuar në nevojat ti përshtatet numrit të punësuarëve në këtë Zyrë,” raportojnë mediat gjermane duke ju referuar një dokumenti të brendshëm të ministrisë së Financave.

Më tej sqarohet, se Zyra e Ish-kancelares ekziston jo për “shkaqe statutore”, por për “plotësimin e detyrimeve që kanë rrjedhur nga mandati i kancelarit, si dhe detyrave të reja”.

Thuhet, se kur është fjala për funksionin e Zyrës, “përjashtohet përdorimi për qëllime familjare, si dhe realizimi i shpenzimeve shtesë”.

“Likuidimi i shpenzimeve të udhëtimit bëhet vetëm nëse Ish-Kancelarja udhëton me urdhër dhe për qëllim të interesave të Gjermanisë”, thuhet në shkresën e ministrisë së Financave drejtuar Komisionit për Buxhet pranë Bundestagut. Në shkresë nuk saktësohet se për cilin udhëtim është fjala.

Shumë të punësuar

Më tutje kritikohet edhe numri shumë i madh i të punësuarëve në Zyrë. Sipas ligjit nga viti 2019, Bundestagu financon maksimalisht pesë të punësuar për ish-krerët e qeverive: drejtuesin e zyrës, dy nëpunës, sekretarin dhe shoferin. Pas pesë viteve ky numër ulet në katër persona.

Zyra e Ish-Kancelares Angela Merkel për momentin ka nëntë nëpunës. Të punësaurit në Zyrën e ish-kancelarëve janë në borderonë e Zyrës së Kancelarit.

Në fillim të vitit, Zyra e Ish-Kancelarit Gerhard Schroeder është mbyllur përkohësisht pasi që Schroederin, për shkak të qëndrimit të tij miqësor ndaj presidentit rus Vladimir Putin, e braktisën të gjithë të punësuarit. Ish-Kancelari duke kundërshtuar këtë vendim ka ngritur padi penale pranë Gjykatës Administrative.

Partia E majta e Gesine Loetzsch kërkon të anulohet kjo praktikë e financimit të zyrës për ish-kancelarët.

“Ne nuk duhet të financojmë përjetë këtë aparat oborrtar. Nëse ish kancelarët dhe kancelaret vërtetë kryejnë ndonjë punë për interes të Gjermanisë, këto shpenzime lehtë mund të kompensohen,” tha Loetzsch.