Rekord botëror, Spanjë: Policia kap 32 ton marijuanë me vlerë 64 mln euro

Policia spanjolle ka bërë të ditur sot se ka kapur 32 ton marijuanë me vlerë tregu 64 milionë euro, sasi rekord kjo e kapur ndonjëherë në Spanjë dhe në botë.

Policia ka kryer shumë kontrolle në shumë ferma dhe kapanone nëpër gjithë Spanjën në aksionin e koduar “Jardines” /lexo shqip: Kopshtet/ ku u arrestuan 9 meshkuj dhe 11 gra, të moshës 20-59 vjeç.

“Garda civile ka kapur sasinë më të madhe të marijuanës të kapur ndonjëherë,” kanë bërë të ditur forcat e sigurisë duke shtuar:

“Ky është ekuivalent i 1.1 milionë bimëve”.

Policia bëri të ditur se grupi kriminal thante marijuanën, paketonte dhe e dërgonte nëpër Spanjë, Zvicër, Holandë, Gjermani dhe Belgjikë. Anëtarët e bandës janë arrestuar gjatë muajit të kaluar në Toledo, Ciudad Real, Valencia dhe Asturia, por detajet e operacionit u bënë sot publike.