Kasmi: Po raportoja mbi protestën, kur më goditën me shkopinj gome…
Kryeredaktori i RD, Bledi Kasmi u shpreh nga spitali i Traumës në Tiranë, ku po merr mjekimin, se është goditur në mënyrë të pabesë nga forcat e policies. Kasmi tha se ishte duke raportuar lajmin nga protesta që po zhvillohej para Ministrisë së Brendshme.
Në një prononcim për mediat, Kasmi tha se mjekët i kanë bërë 10 të qepura në kokë për shkak të çarave të shkaktuara nga goditjet e policisë me shkopinj.
“Kjo ndodh kur një ministër vjen nga hetuesia e diktaturës. Kur ia bën një gazetari, mendoni se çfarë mund ti bëjnë një qytetari.
U godita në mënyrë të pabesë me shkop gome dy apo 3 herë, pastaj ndërhynë deputetët e PD-së Albana Vokshi dhe Gent Strazimiri që më dhanë ndihmën e parë”, tha Kasmi.
Ndërkohë, në spital ka shkuar për të vizituar kryeredaktorin e RD edhe kryetari i PD, Lulzim Basha. Kreu i PD në fjalën mbyllëse para protestuesve tek Ministria e Brendshme u shpreh se Kasmi ishte në krye të detyrës kur u dhunua nga forcat e policisë.
Dhuna policore ndaj kryeredaktorit të RD u denoncua edhe nga ish-Kryeministri Berisha.
“Narkobanditet me uniformë përgjakin protestën e opozitës, godasin kryeredaktorin e gazetës Rilindja Demokratike, Bledi Kasmi! sb’, shkruan ish-Kryeministri Berisha në Facebook.
