KE nuk njeh çertifikatat e Shqipërisë, PD: Përdorimi i vaksinave të paçertifikuara nga EMA, penalizon shqiptarët!

Pas vendimit të Komisionit Evropian që nga 20 gushti do të pranojë çertifikatat e vaksinimit kundër COVID-19 të Maqedonisë së Veriut por jo edhe Shqipërisë ka reaguar Partia Demokratike përmes deputetes Dr.Zheni Gjergji duke theksuar se me daljen e regjimit të Edi Ramës jashtë rregullave të BE duke përdor vaksina të paçertifikuara nga EMA, po penalizohet lëvizja e lirë e shqiptarëve.

“Përdorimi i vaksinave të paçertifikuara nga EMA në popullatë, duke dalë jashtë rregullave të BE, po penalizon pranimin e çertifikatës së gjelbër (green pass) që lejon lëvizjen e lirë, në zonën Shenghen,” thekson Dr.Zheni Gjergji në reagimin e saj përmes rrjetit social Facebook duke shtuar se shqiptarët meritojnë më shumë se sa një qasje të korruptuar të sistemit të shëndetësisë dhe vaksinimit: Shqiptarët meritojnë dinjitet dhe liri udhëtimi!

Reagimi:

Komisioni Evropian ka bërë të ditur se Bashkimi Evropian (BE) nga 20 gushti do të pranojë çertifikatat e vaksinimit kundër koronavirusit të ri (COVID-19) të Maqedonisë së Veriut.

Ndërsa Shqipëria për shkak të procesit të vaksinimit jo serioz dhe korrupsionit të përhapur në sistemin e Shëndetësisë, si edhe hyrjes së virusit të rryfshetit për të bërë vaksinën e sigurt “Pfizer” – është jashtë vëmendjes.

Përdorimi i vaksinave të paçertifikuara nga EMA në popullatë, duke dalë jashtë rregullave të BE, po penalizon pranimin e çertifikatës së gjelbër (green pass) që lejon lëvizjen e lirë, në zonën Shenghen.

Shqiptarët meritojnë më shumë sesa një qasje të korruptuar të sistemit të shëndetësisë dhe vaksinimit. Shqiptarët meritojnë dinjitet dhe liri udhëtimi.