Kërkesa e SPAK për “masën”, Berisha: Unë e votoj që nesër. S’kam asnjë kundërshtim!

Sot, kur kërkesa e SPAK për ndryshimin e masës së sigurisë për Ish-Kryeministrin në çështjen “Partizani” është në Zyrën e Kryetares së Parlamentit të Edi Ramës, Lindita Nikolla, duke sqaruar se me kundërshtimin e vendimit të gjykatës ka mbrojtur Parlamentin, Sali Berisha vazhdon ti qëndroj besnik deklaratës së parë dhe thotë se e voton që nesër heqjen e imunitetit pa asnjë kundërshtim.

Ndonëse kërkesa është e bazuar mbi një vendim antikushtetues, Kryetari i Partisë Demokratike thekson se ky akt që ndërmerret kundër tij, është një frymëzim dhe kushtrim i ri për opozitën.

“Në vitin 2012, Sali Berisha ka dërguar në parlament, abrogimin nga Kushtetuta të çdo lloj mbrojtje të deputetëve të Kuvendit të Shqipërisë. Ky amendament i qeverisë, është kundërshtuar në mënyrë të prerë nga Edi Rama dhe është pranuar vetëm lejimi i hetimit të deputetëve.

Kështu që unë kam deklaruar edhe unë këtu para jush se jam i gatshëm ta votoj vetë këtë ligj edhe sot dhe nuk kam asnjë kundërshtim. Nëse unë nuk kam pranuar urdhrin e gjykatës dhe SKAP-it nuk e kam pranuar sepse ajo është shkruarje e kushtetutës. Kam mbrojtur parlamentin dhe pushtetin e tij dhe absolutisht jo, Sali Berishën.

Pra unë kam refuzuar të zbatoj një urdhër antikushtetues nga një gjykatës tërësisht në konflikt interesi. E shkarkuar nga unë në datën 8 shkurt 1996 dhe që e fsheh këtë fakt. Por, përsa i përket konsistencës time ndaj propozimit 2012 ajo qëndron plotësisht. Unë jam që deputetët të mos kenë asnjë lloj dallimi nga qytetarët e thjeshtë në Kushtetutë.

Kjo është një kërkesë krejtësisht normale dhe unë do ta lexoj shkresën me më hollësi, por në parim jam 100% dakord, nuk duhet të ketë për deputetët mbrojtje. Ajo është mbrojtje parlamenti, unë kam mbrojtur parlamentin jo Sali Berishën.

Por që një gjykatës të thotë se, nuk është heqje lirie heqja e daljes jashtë shtetit, ku kushtetuta sanksionon një nen të veçantë për daljen jashtë shtetit të shtetasve. Kjo është tallesh me kushtetutën, ose të rishkruash kushtetutën.

Unë kam mbrojtur thjeshtë pushtetin e parlamentit. Do parlamenti që ta dorëzoj që nesër, unë e votoj që nesër. Nuk kam asnjë kundërshtim. Nuk mund të ketë. E kam thënë dhe e them. Besoj se isha i qartë në këtë pohim timin.

Kanë gabuar rëndë ata që kanë kujtuar se unë nuk paraqitem. Unë e kam thënë me dhjetëra, jam paraqitur dhe paraqitem. Por në këtë rast kemi të bëjmë me shkruarjen e kushtetutës, një akt puçist. Marrje pushteti për llogari të Edi Ramës, nga gjykatës dhe prokurorë të përgjegjshëm. Kaq,” tha Sali Berisha pas arritjes së kërkesës së SPAK në Parlament për arrestimin/heqjes së lirisë së deputetit me zëvendësimin e masës së sigurisë, duke siguruar se do respektoj çdo vendim të Parlamentit ndërsa akuzoj Edi Ramën se kjo ishte e gjitha vepër e tij.

“Çfarëdo vendimi pas autorizimit të parlamentit, do ta respektoj pa asnjë diskutim.

Qëndrimi im, i përsëritur këtu, ua kam thënë sa herë keni pyetur, ka të bëjë me kushtetutshmërinë e vendit.

Unë nuk mund të bëhesha kurrë njeriu që zbatoi një vendim antikushtetues. Isha në vështirësi në këtë rast se kishte të bënte me mua, por ai ishte një akt i shkruarjes së Kushtetutës në zyrat e prokurorëve ose gjykatësve.

Nuk mund të ndodhte dhe nuk ndodh kurrë përmes Sali Berishës.

Tani parlamenti të vendosë ç’të dojë, sepse unë kam firmosur në vitin 2012, abrogimin e nenit 70 të Kushtetutës, pikës 3 që i jep atributet deputetit.

Ndaj dhe kjo është një gjë që po e vendosi parlamenti… unë vetë po e përgatisja për ta dërguar në Gjykatën Kushtetuese.

Se në rast se Gjykata Kushtetuese vendos, unë do e zbatoj sepse vendimi i Gjykatës Kushtetuese është i barabartë me prerogativën kushtetuese.

Një vendim i Gjykatës Kushtetuese për mua do ishte 100 përqind i zbatueshëm për faktin se në doktrinën e të drejtës, vendimi i Gjykatës Kushtetuese është i barabartë me prerogativën dhe ajo bëhej shteg për t’u zbatuar ai amendament që unë kam çuar në vitin 2012.

Kjo e gjitha është e Edi Ramës, por unë këtu para jush e kam thënë 100 herë që jam pa asnjë kusht për hetimin, sepse e kemi hequr nga Kushtetuta hetimin. Unë nuk mund të kem dy qëndrime, unë jam njeri i një standardi.

A është i drejtë apo i padrejtë, ai është tjetër qëndrim, por asnjë lloj shmangie nga organet e drejtësisë nuk mund të ketë, përveç rastit kur ato i morën pushtet parlament.

Tani e zgjidh parlamenti. Sa herë kanë ardhur për të sjellë ato fletushkat, u kam thënë dërgojini në parlament. Kjo ka qenë përgjigjia ime.

Tani vendos parlamenti, të jetë fare i lirë parlamenti,” tha Kryetari i Partisë Demokratike duuke siguruar se vendimi i Parlamentit do të zbatohet nga Sali Berisha, sado që vendimi i SPAK është vendim i paligjshëm, i bazuar në një vendim të paligjshëm.

“Tani, edhe njëherë.

Vendimi i parlamentit do të zbatohet nga Sali Berisha, sado që vendimi i skap është vendim i paligjshëm, i bazuar në një vendim të paligjshëm.

Por nëse parlamenti, se edhe njëherë, kufizimet ndaj drejtësisë, imuniteti, nuk janë të individit, janë në radhë të parë të parlamentit. Janë të parlamentit në mënyrë që askush të mos mund ta destabiliziojë me procedura të tjera parlamentin. Ky është morali i tyre. Pastaj sigurisht individi është pjesë e parlamentit,” tha Kryetari i Partisë Demokratike, Sali Berisha duke e cilësuar edhe këtë vendim të paligjshëm të Edi Ramës si frymëzim për opozitën ndërsa përfundoi.

“Nëse parlamenti pranon këtë vendim të paligjshëm të bazuar edhe ky mbi një vendim antikushtetues të paligjshëm është përgjegjësia e tij. Unë do të përputhem me veprimet e gjyqësorit.

Përsa i përket opozitës të garantoj se asgjë nuk e ndalon dot betejën e saj pa kthim gjer në fitore. Ajo do të zhvillohet në çdo skaj dhe shqiptarët e shohin këtë si një përpjekje tjetër për të dëmtuar opozitën dhe për ta ç’aktivizuar atë.

Por e kundërta do të ndodhë.

Ky është një frymëzim për opozitën. Ky akt që ndërmerret kundër meje, është një frymëzim dhe kushtrim i ri për opozitën. Në këtë kontekst ndihem më i motivuar se kurrë.”

Ndryshe, Prokuroria e Posaçme i është drejtuar Kryetares së Parlamentit të Edi Ramës, Lindita Nikolla, me kërkesë për dhënien e autorizimit nga Parlamenti për arrestimin/heqjes së lirisë së deputetit Sali Berisha nëpërmjet zëvendësimit të masës së sigurimit nga “detyrim për t’u paraqitur në policinë gjyqësore” dhe “ndalim i daljes jashtë shtetit” në “arrest me burg/ arrest në shtëpi”.

Pas akuzave të ngritura kundër Ish-Kryeministrit Sali Berisha lidhur me privatizimin e ish-kompleksit Partizani, GJKKO ka miratuar masën “detyrim për t’u paraqitur në policinë gjyqësore” dhe “ndalim i daljes jashtë shtetit”, e cila është kundërshtuar nga Berisha duke u cilësuar si antikushtetuese.